ރޯމް (އޭޕްރީލް 29) - ޔުއެފާ ޔޫރޮޕާ ލީގުގެ ސެމީ ފައިނަލުގައި މިރޭ މެންޗެސްޓާ ޔުނައިޓެޑް ކުޅޭ މެޗުގެ ކުރިން އެ ޓީމުގެ ކޯޗު އޮލެ ގުނަ ސޯލްޝެއާ އިދިކޮޅަށް ނުކުންނަ އިޓަލީގެ އޭއެސް ރޯމާއާ ބެހޭގޮތުން ބުނި އެއްޗަކުން ރޯމާ ސަޕޯޓަރުން ހިތްހަމަނުޖެހިއްޖެ އެވެ.
އެންމެ ފަހުން ޔޫރޮޕާ ލީގުގައި ޔުނައިޓެޑުން ގްރަނާޑާ އަތުން މޮޅުވި މެޗަށް ފަހު ސެމީ ފައިނަލާ ބެހޭގޮތުން ނޫސްވެރިއަކު ކުރި ސުވާލަށް ޖަވާބު ދެމުން ސޯލްޝެއާ ބުނީ ރޯމާ ކުޅޭތަން ނުދެކޭ ކަމަށާއި އެ ޓީމު ނޭނގޭ ކަމަށެވެ. އެކަމާ ހިތްހަމަނުޖެހި ރޯމާގެ ސަޕޯޓަރުން ވަނީ ޓްރެއިނިން ދަނޑުގައި ސޯލްޝެއާގެ ބަސްކޮޅު ހިމަނައިގެން ބެނާ އެއް ދަމައިފަ އެވެ. އޭގައި ޖަހާފައި ވަނީ "އަހަންނަށް އެ މީހުން ނޭނގޭ. އަހަރެން އެ މީހުން ކުޅޭތަނެއް ނުދެކެން،" މިހެނެވެ.
މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ސޯލްޝެއާ ވަނީ އޭނާ ކުރިން ދެއްކި ވާހަކަ ދިފާއުކޮށްފަ އެެވެ. ސޯލްޝެއާ ބުނީ އޭނާ ކުރިން ރޯމާއާ ބެހޭގޮތުން އެ ގޮތަށް ބުނީ މެޗަކަށް ފަހު އައި ގޮތަށް ކުއްލިއަކަށް އަމާޒުވި ސުވާލެއްގެ ޖަވާބެއްގެ ގޮތުން ކަމަށެވެ.
ރޯމާ ސަޕޯޓަރުން ދަމާފައިވާ ބެނާއެއް.--- ފޮޓޯ: ރޯމާ
"އަހަރެން ބެލިން އެ މީހުން ކުޅޭތަން. އަހަރެން އެ ވަގުތު އެ މީހުންނާ ބެހޭގޮތުން އަމާޒުވި ސުވާލަށް ޖަވާބެއް ނުދިނީ ފުރިހަމަ އަށް އެ ޓީމު ދެނެނުގަނެ ސީދާ ވާހަކައެއް ނުދައްކަން. އެ މީހުންނަށް އިހުތިރާމް ކުޑަކުރާ ކަހަލަ ވާހަކައެއް އަހަރެން ނުދައްކާނަން،" ސޯލްޝެއާ ބުންޏެވެ.
"ހަގީގަތުގައި އަހަންނަށް އިހުސާސްކުރެވޭ ވާހަކަތައް ބުނެލެވުނު ނަމަ ރަނގަޅުވާނެ. ރޯމާ އަކީ ވަރަށް މޮޅު ވަރަށް ރަނގަޅު ތާރީހެއް އޮތް ޓީމެއް،"
ސޯލްޝެއާ، ޔުނައިޓެޑާ ހަވާލުވިތާ މިވީ 18 މަސް ދުވަހުގެ ތެރޭގައި އެ ޓީމު ވަނީ ހަތަރު ސެމީ ފައިނަލުން ބަލިވެފަ އެވެ. ޔުނައިޓެޑާ އެކު ކުޅުންތެރިއެއްގެ ގޮތުގައި ސޯލްޝެއާ ވަނީ ގިނަ ކާމިޔާބީތަކެއް ހޯދައިފަ އެވެ. ސޯލްޝެއާ ބުނީ ކުޅުންތެރިއެއްގެ ގޮތުގައި ހޯދި ކާމިޔާބީ ކޯޗެއްގެ ގޮތުގައި ތަކުރާރުކުރަން ބޭނުންވާ ކަމަށެވެ.
ކޯޗިން ކެރިއަރުގައި ސޯލްޝެއާ އެންމެ ފަހުން ހޯދި ޓްރޮފީ އަކީ 2013 ވަނަ އަހަރު ނޯވޭގެ ކަޕް އެވެ.
މިއީ ޔޫރޮޕާ ލީގުގައި ރޯމާ އާއި ޔުނައިޓެޑްގެ ފުރަތަމަ ކުރިމަތިލުމެވެ. މީގެ ކުރިން މި ދެ ޓީމު ކުޅުނު ހަތް މެޗަކީ ވެސް ޗެމްޕިއަންސް ލީގުގެ މެޗުތަކެވެ. އެ ހަތް މެޗުގެ ތެރެއިން ޔުނައިޓެޑް ބަލިވީ އެންމެ މެޗަކުންނެވެ. ޔުނައިޓެޑް ހަ މެޗުން މޮޅުވިއިރު، އެއް މެޗު ނިމުނީ އެއްވަރުވެގެންނެވެ. ރޯމާ އެންމެ ފަހުން އިންގްލެންޑްގެ ޓީމެއް ދަނޑުގައި މޮޅުވެފައިވަނީ 2001 ވަނަ އަހަރު ލިވަޕޫލް އަތުން މި މުބާރާތުގަ އެވެ.
ޔުނައިޓެޑް ދަނޑުގައި ރޯމާއާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.
