މެންޗެސްޓާ (އޭޕްރިލް 10) - މި ސީޒަނަށް ފަހު މެންޗެސްޓާ ސިޓީ ދޫކޮށްލަން ނިންމާފައިވާ އާޖެންޓީނާގެ ފޯވާޑް ސާޖިއޯ އަގުއޭރޯ އިނގިރޭސި ޕްރިމިއާ ލީގުގެ އެހެން ކްލަބަކާ ގުޅުނަސް ޝަކުވާއެއް ނެތް ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ދިހަ އަހަރަށް ފަހު އަގުއޭރޯ ސިޓީ ދޫކޮށްލާއިރު، އޭނާ ދެން ގުޅޭނެ ކްލަބަކާ ބެހޭގޮތުން ގިނަ ވާހަކަތަކެއް އަންނަނީ ދެކެވެމުންނެވެ. ރިޕޯޓްތައް ބުނާގޮތުން އަގުއޭރޯ ހޯދަން ބައެއް ޕްރިމިއާ ލީގުގެ ކްލަބްތަކުން ވެސް ޝައުގުވެރިވެ އެވެ. އޭގެތެރޭގައި ޗެލްސީ އާއި އާޖެންޓީނާގެ ކޯޗު މާސެލޯ ބިއެލްސާގެ އިރުޝާދުގެ ދަށުން ކުޅެމުން އަންނަ ލީޑްސް ޔުނައިޓެޑް ހިމެނެ އެވެ. އަދި ޓޮޓެންހަމުން ވެސް އަގުއޭރޯ އަށް ކުރު ކޮންްޓްރެކްޓެއް ހުށަހަޅަން ތައްޔާރަށް އޮތް ކަމަށް ރިޕޯޓްތައް ބުނެ އެވެ.
ސިޓީގެ ކޯޗު ގާޑިއޯލާ ބުނީ އޭނާ އަބަދުވެސް އެދޭނީ އަގުއޭރޯ އަށް ރަނގަޅު ގޮތް ވުމަަށް ކަމަށެވެ.
"އަހަރެން އަގުއޭރޯގެ ކޮންމެ ނިންމުމަކަށް އިހުތިރާމްކުރާނަން. އެކަން އޭނަ (އަގުއޭރޯ) އަށް ވެސް އެނގޭނެ. ސިޓީން އަބަދުވެސް އެދޭނީ އަގުއޭރޯ އަށް ރަނގަޅުގޮތްވާން. އެއީ ކުރިއަށް އޮތީ އޭނާގެ ކެރިއަރުގެ ފަހު އަހަރުތައް،" އުމުރުން 32 އަހަރުގެ އަގުއޭރޯއާ ބެހޭގޮތުން ގާޑިއޯލާ ބުންޏެވެ.
އެތުލެޓިކޯ މެޑްރިޑް ދޫކޮށް 2011 ވަނަ އަހަރު ސިޓީ އަށް ބަދަލުވި އަގުއޭރޯ ފަހަކަށް އައިސް ގިނަ މެޗުތަކުގައި ކުޅެފައިވަނީ ބަދަލު ކުޅުންތެރިއެއްގެ ގޮތުގަ އެވެ. ސިޓީއާ އެކު ހަތަރު ފަހު ޕްރިމިއާ ލީގު ކާމިޔާބުކޮށްފައިވާ އަގުއޭރޯ އަކީ އެ ކްލަބްގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ އެވެ. އޭނާ ވަނީ އެ ޓީމަށް 384 މެޗުން 257 ގޯލު ކާމިޔާބުކޮށްދީފަ އެވެ.
މި ސީޒަނުގައި އަނިޔާގެ ސަބަބުން ގިނަ މެޗުތަކެއް އަގުއޭރޯ އަށް ވަނީ ގެއްލިފަ އެވެ. ރިޕޯޓްތައް ބުނާގޮތުން އަގުއޭރޯގެ ސޮއި ހޯދަން ސްޕެއިނުގެ ބާސެލޯނާ އާއި އިޓަލީ އަދި އޭނާގެ އުފަން ގައުމު އާޖެންޓީނާގެ ކްލަބްތަކަކުން ވަނީ ކޮންޓްރެކްޓް ހުށަހަޅައިފަ އެވެ.
