މެންޗެސްޓާ (އޭޕްރީލް 5) - ކަކުލަށް ލިބިފައިވާ އަނިޔާ އިން ރަނގަޅުވެ ދެން މި ސީޒަނުގައި މެންޗެސްޓާ ޔުނައިޓެޑްގެ ފްރާންސް ފޯވާޑް އެންތަނީ މާޝިއަލް އަށް ނުކުޅެވިދާނެ ކަމުގެ ބިރު އެބައޮތް ކަމަށް ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނެފި އެވެ.
އުމުރުން 25 އަހަރުގެ މާޝިއަލްގެ ކަކުލަށް އަނިޔާވީ މިދިޔަ ހަފްތާގެ އާދިއްތަ ދުވަހު ވޯލްޑް ކަޕް ކޮލިފައިންގައި ކަޒަކްސްތާން އަތުން ފްރާންސް މޮޅުވި މެޗުގަ އެވެ. އެ މެޗަށް ފަހު ފްރާންސްގެ މީޑިއާތަކުން ރިޕޯޓްކުރީ މާޝިއަލްގެ އަނިޔާ އެހާ ސީރިއަސް ނޫން ކަމަށް ބުނެ އެވެ. އެކަމަކު ފަހުން ހެދި ޓެސްޓްތަކުން އެ އަނިޔާ ސީރިއަސްކަން އެނގިފައިވެ އެވެ.
އިނގިރޭސި ޕްރިމިއާ ލީގުގައި ރޭ ބްރައިޓަން އަތުން ޔުނައިޓެޑް މޮޅުވި މެޗަށް ފަހު ސޯލްޝެއާ ބުނީ ސީޒަނުގެ ބާކީ ބައިގައި މާޝިއަލް ނުލައި ކުޅެން ޖެހިދާނެ ކަމަށެވެ.
"މި ސީޒަނުގެ ނިޔަލަށް މާޝިއަލް އަށް ދެން ނުކުޅެވުމުގެ ބިރު އޮތުމަކީ ދެރަ ކަމެއް. ފްރާންސްގެ ރިޕޯޓްތަކުން މާޝިއަލްގެ އަނިޔާ ސީރިއަސް ނޫން ކަމަށް ބުނި ނަމަވެސް މިހާރު ފެންނަނީ އެ މަންޒަރެއް ނޫން," ސޯލްޝެއާ ބުންޏެވެ.
މިދިޔަ ސީޒަނުގައި މާޝިއަލްގެ ފަރާތުން ފެނުނު މޮޅު ކުޅުން މި ސީޒަނުގައި އަދި އޭނާ އަށް ތަކުރާރެއް ނުކުރެވެ އެވެ. ސީޒަނުގައި މިހާތަނަށް އޭނާ އަށް ޖެހުނީ ހަތް ގޯލެވެ. އަދި 2021 ވަނަ އަހަރު ފެށި ފަހުން ކުޅުނު 19 މެޗުން ޖެހީ ތިން ގޯލެވެ. މި ސީޒަނުގެ ކުރީކޮޅުގައި ވެސް އަނިޔާގެ ސަބަބުން މާޝިއަލް އަށް މެޗުތަކެއް ގެއްލުނެވެ.
އައިވަރީ ކޯސްޓަށް ކުޅުމަށް ފަހު އެނބުރި އައިއިރު ޔުނައިޓެޑްގެ ޑިފެންޑަރު އެރިކް ބެއިލީ ކޮވިޑަށް ޕޮޒިޓިވްވެފައިވުމުން ކުރިއަށް ހުރި ބައެއް މެޗުތައް އޭނާ އަށް ވެސް ގެއްލޭނެ އެވެ. ޔޫރޮޕާ ލީގުގެ ކުއާޓާ ފައިނަލުގައި ބުރާސްފަތި ދުވަހުގެރޭ ޔުނައިޓެޑުން ގްރަނާޑާއާ ދެކޮޅަށް ކުޅޭނެ އެވެ.
