މެދުއިރުމަތީ ގައުމަކަށް ހަނގުރާމައަށް ގޮސް ފަހުން ތުރުކީއަށް ހިޖުރަކޮށް, ތާށިވެފައި ތިބި ތިން ދިވެހިންގެ ތެރެއިން ދެ ދިވެހިން ރާއްޖެ ގެނެސްފައިވާ ކަމަށް ހޯމްލޭންޑް ސެކިއުރިޓީ މިނިސްޓްރީން މިއަދު ބުނެފި އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވީ އެ ތިން ދިވެހިން ތުރުކީ ސަރުކާރުން ޑިޓެއިންކޮށް ދިވެހި ސަރުކާރަށް އެންގުމާއެކު، ދެ ދިވެހިން ރާއްޖެ ގެނެވުނީ ރާއްޖޭގެ އެކި މުއައްސަސާތައް ގުޅިގެން ކުރި މަސައްކަތުން ކަމަށެވެ.

މިގޮތުން ރާއްޖެ ގެނެސްފައިވަނީ 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ އެވެ. އެ ކުއްޖާ އާއި މަންމައަށް ނެޝަނަލް އިންޓަގްރޭޝަން ސެންޓަރުގައި ދަނީ ހިދުމަތް ދެމުންނެވެ.

"ތުރުކީގައި ދިވެހިރާއްޖޭގެ ތިން ރައްޔިތަކު މިފަދަ ހަނގުރާމައިގައި ބައިވެރިވުމަށް އެހެން ގައުމަކަށް ގޮސް، ފަހުން ތުރުކީއަށް ހިޖުރަކުރެވި އެ ތަނުގެ ތެރޭޭގައި ތާށިވެފައި ތިބި މައުލޫމާތު. ތުރުކީގެ ސަރުކާރުގެ ފަރާތުން، އެ ފަރާތްތައް ޑީޓެއިންކޮށް ދިވެހި ސަރުކާރަށް އެންގުމާއެކުގައި އަޅުގަނޑުމެންގެ ގުޅިފައިވާ އެކިއެކި މުއައްސަސާތައް މެދުވެރިވެގެން އެ ފަރާތްތައް ރާއްޖެ ގެނައުމަށް މަސައްކަތްތަކެއް ވަނީ ކޮށްފައި،" މިނިސްތަރު ވިދާޅުވި އެވެ.

"އެގޮތުން ކުރެވުނު މަސައްކަތްތަކުގެ ނަތީޖާއެއް ގޮތުން 14 އަހަރުގެ އަންހެން ކުއްޖަކާއި އަދި އެ ކުއްޖާގެ މަންމަ ވަނީ މިހާރު ރާއްޖެ ގެނެވި ނެޝަނަލް އިންޓަގްރޭޝަން ސެންޓަރުގައި ދޭންޖެހޭ ހިދުމަތް ދަނީ ދެމުން."

ނަމަވެސް ތިންވަނަ ދިވެހި މީހާ ރާއްޖެ އަނބުރާ ނުގެންނަނީ ކީއްވެގެން ކަމެއް އަދި އޭނާ ކޮބައިކަމެއް އިހުސާން ވިދާޅެއް ނުވެ އެވެ.

އިހުސާން ވިދާޅުވީ ހަނގުރާމައިގެ ސަރަހައްދުތަކުގައި ތާށިވެފައި ތިބި 23 މީހަކު ރާއްޖެ ގެނެސް މިހާތަނަށް ރީއިންޓަގްރޭޓް ކޮށްފައިވާ ކަމަށެވެ.

ސީރިއާ ބައެއް ސަރަހައްދުތައް އިސްލާމިކް ސްޓޭޓް (އައިއެސް) އާއި އަލްގައިދާއިން ކޮންޓްރޯލްކުރި ދުވަސްވަރު އެ ޖަމާއަތްތަކާ ގުޅެން ދިވެހިންގެ އެތައް ބަަޔަކު ދިޔަ އެވެ.

އޭގެ ތެރެެއިން ބައެއް މީހުން ދިޔައީ އަނބިދަރިން ވެސް ގޮވައިގެންނެވެ. އެ މީހުންގެ ތެރެއިން އެތައް ބަޔަކު މަރުވެފައި ވާއިރު، އަދިވެސް ކޭމްޕުތަކުގައި ދިވެހިން އެބަ ތިއްބެވެ.

ސީރިއާގެ ކޭމްޕުތަކުގައި ތިބި ދިވެހިން ގެނައުމުގެ މަސައްކަތް ފުރަތަމަ ކުރަން ފެށީ ނިމިދިޔަ ސަރުކާރުންނެވެ.