މެދިއިރުމަތީގައި ހިނގަމުންދާ ހަނގުރާމައާ ގުޅިގެން އެ ސަރަހައްދުން ދަތުރުކުރާ ގިނަ ފްލައިޓުތަކެއް ކެންސަލް ކުރުމާއެކީ ދުވާލަކު އަންނަ ޓޫރިސްޓުންގެ އަދަދު ވަރަށް ބޮޑަށް މަދުވެފައިވާ ކަމަށް ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކައިފި އެވެ.

ޓޫރިޒަމުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، ހޯމަ ދުވަހު ރާއްޖެ އައީ 4،107 ޓޫރިސްޓުންނެވެ. މިއީ މި އަހަރުގެ މިހާތަނަށް އެންމެ މަދުން ޓޫރިސްޓުން އައި ދުވަހެވެ. ދެން އެންމެ މަދުން ޓޫރިސްޓުން އައި ދުވަހު، އެއީ މިދިޔަ ޖެނުއަރީ 1، ގައި އައީ 5،929 ޓޫރިސްޓުންނެވެ.

އަހަރުންއަހަރަށް އަޅައިބަލާއިރު، މި މަހުގެ ފުރަތަމަ ދެ ދުވަހު އައި ޓޫރިސްޓުންގެ އަދަދު މިދިޔަ އަހަރަށް ވުރެ 37 ޕަސެންޓުު މަދެވެ.

ޓޫރިސްޓު ނަމްބަރުތައް ވެއްޓެމުންދާއިރު، ދުނިޔޭގެ އެކި ކަންކޮޅުތަކުން ރާއްޖެއަށް ކަނެކްޓިވިޓީ ފޯރުކޮށްދޭ ޔޫއޭއީ އާއި ގަތަރުގައި މަރުކަޒުވެފައިވާ އެއާލައިންތަކުގެ އޮޕަރޭޝަންތައް ހުއްޓާލިތާ މިއަދަށް މިއީ ފަސް ވަނަ ދުވަހެވެ.

މިއަދު އެކަނި ވެސް ގަލްފު ގައުމުތަކުގެ އެއާލައިންތަކުން ރާއްޖެ އަންނަން އޮތް ނުވަ ފްލައިޓެއް ވަނީ ކެންސަލްކޮށްފަ އެވެ. މިއާ އެކީ، ފަސް ދުވަހުގެ ތެރޭގައި ކެންސަލް ކުރި އެރައިވަލްތަކާއި ޑިޕާޗާތައް ހިމަނައިގެން މިހާތަނަށް ކެންސަލް ކުރި ފްލައިޓުތަކުގެ އަދަދު 100 އާ ގާތްކުރެ އެވެ.

މެދުއިރުމަތީގެ ގިނަ ގައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން ގަލްފުގެ ތިން އެއާލައިނެއްގެ މަތިންދާބޯޓުތައް ވެލާނާ އިންޓަނޭޝަނަލް އެއާޕޯޓުގައި ގްރައުންޑްވެފައިވާ ކަމަށް މައުލޫމާތު ލިބެ އެވެ. އެއީ ގަތަރު އެއާވޭސްގެ ދެ މަތިންދާބޯޓަކާއި އެމިރޭޓްސްގެ މަތިންދާބޯޓަކާއި އިއްތިހާދު އެއާވޭސްގެ މަތިންދާބޯޓެކެވެ.

ޓޫރިސްޓުންގެ އަދަދު މަދުވީ ވަރު ހިސާބުކުރެވުނު ނަމަވެސް، މި ޓޫރިސްޓުންގެ ތެރެއިން މެދިއިރުމަތިން ޓްރާންސިޓު ވާގޮތަށް އޮތުމާ ގުޅިގެން ނާދެވުނު ސީދާ ޓޫރިސްޓުންގެ އަދަދެއް ނޭނގެ އެވެ. މި އަދަދު އަދި ޓޫރިޒަމް މިނިސްޓްރީން އަދި ހާމައެއް ނުކުރެ އެވެ.

މިހާތަނަށް އާންމުކޮށްފައިވާ ބައެއް ހިސާބުތަކާއި ގަލްފު އެއާލައިންތަކުން އުފުލި ފަސިންޖަރުންގެ އެވަރެޖު އަދަދުތަކުން އަންދާޒާ ކުރެވެނީ ރާއްޖެ އަންނަ ކޮންމެ ހަތަރު ޓޫރިސްޓުންގެ ތެރެއިން އެކަކު އަންނަނީ ގަލްފުން ނޫނީ ގަލްފުން ޓްރާންސިޓު ވެފަ އެވެ.

މިއީ ކޮންމެ ދުވަހަކު ގާތްގަނޑަކަށް 2،000 ޓޫރިސްޓުންނެވެ. މިއީ އަދަދު ކަމަށް ބަލައިގެން ހިސާބުކުރާނަމަ ރާއްޖެއަށް 10،000 ޓޫރިސްޓުން ވަނީ ގެއްލިފަ އެވެ. ހަނގުރާމަ ދިގުލައިގެންދާ ކޮންމެ ދުވަހެއްގައި މި އަދަދު މި ރޭޓުގައި އުފުލެމުންދާނެ ކަމަށް އަންދާޒާކުރެވެ އެވެ.