އިރާނަށް ދެމުންދާ އަސްކަރީ ހަމަލާތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕާއި ސެކްރެޓަރީ އޮފް ސްޓޭޓް މާކޯ ރޫބިއޯ ދެއްކެވި ވާހަކަ ދިމާނުވާކަން ހާމަވެއްޖެއެވެ.

އިއްޔެ ނޫސްވެރިންނާ ވާހަކަ ދައްކަވަމުން ރައީސް ޓްރަމްޕް ވިދާޅުވީ، އީރާނަށް ހަމަލާދޭން އަމުރުކުރީ އެ ގައުމުން އެމެރިކާއަށް އިސްވެ ހަމަލާދީފާނެ ކަމުގެ "ހީވުމުން" ކަމަށެވެ.

އިޒްރޭލުން މަޖުބޫރު ކުރުވައިގެން ދިން ހަމަލާއެއްތޯ ސުވާލުކުރުމުން ޓްރަމްޕް އެކަން ދޮގުކުރެއްވިއެވެ.

"ނޫން، އަސްލު އިޒްރޭލަށް އެކަން ކުރަން މަޖުބޫރު ކުރުވީ އަހަރެން ކަމަށް ވެދާނެ،" ޓްރަމްޕް ވިދާޅުވިއެވެ.

ނަމަވެސް، މިދިޔަ ހޯމަ ދުވަހު ސެކްރެޓަރީ އޮފް ސްޓޭޓް މާކޯ ރޫބިއޯ ދެއްކެވި ވާހަކަ އާއި ޓްރަމްޕްގެ ވާހަކަ މުޅިން ތަފާތެވެ.

ރޫބިއޯ ވިދާޅުވީ އެމެރިކާއިން އީރާނަށް ހަމަލާދިނީ އިޒްރޭލުން އިރާނަށް ބޮން އަޅަން އުޅޭކަން އެނގުމުންނެވެ. އަދި އިޒްރޭލުގެ ހަމަލާއާ ގުޅިގެން އިރާނުން އެ ސަރަހައްދުގައި ހުރި އެމެރިކާގެ މަރުކަޒުތަކަށް ރައްދު ހަމަލާދޭނެ ކަމަށް ބެލެވޭތީ، އެކަން ހުއްޓުވަން ދިން ހަމަލާއެއް ކަމަށް ރޫބިއޯ ސިފަކުރެއްވިއެވެ.

މި ދެ ބޭފުޅުންގެ ވާހަކަ ދިމާނުވުމާ ގުޅިގެން އަލްޖަޒީރާގެ ރިޕޯޓަރު ކިމްބާލީ ހަލްކެޓް ބުނީ، މި މައްސަލައަކީ އެމެރިކާގައި ބޮޑު ބަހުސަކަށް ވާނެ ކަމަށެވެ.

ސަބަބަކީ އެމެރިކާއަށް ސީދާ ނުރައްކަލެއް އޮތްކަން ސާބިތުނުވާ ނަމަ، ހަނގުރާމަ އިއުލާން ކުރުމުގެ ބާރު ރައީސަށް ލިބިވަޑައިގެންފައި ނުވާތީއެވެ.

"އެމެރިކާގެ ރައީސް މިކަމާ ގުޅޭ އެއްވެސް ހެއްކެއް މިހާތަނަށް ދައްކަވާފައެއް ނުވޭ،" ހަލްކެޓް ފާހަގަކުރިއެވެ.