އިރާނަށް ދިން ހަމަލާތަކަށްފަހު އެމެރިކާގެ ހަތިޔާރުގެ ރިޒާވް އަލުން ފުރިހަމަކުރުމަށްޓަކައި، ހަތިޔާރު އުފައްދާ އެންމެ ބޮޑެތި ކުންފުނިތަކުގެ އިސްވެރިންނާ ބައްދަލުކުރުމަށް ރައީސް ޑޮނަލްޑް ޓްރަމްޕްގެ ސަރުކާރުން ނިންމައިފި ކަމަށް ރޮއިޓާސްއިން ރިޕޯޓްކޮށްފި އެވެ.

ރިޕޯޓްތައް ބުނާގޮތުން، މި އަންނަ ހުކުރު ދުވަހު ވައިޓް ހައުސްގައި ބާއްވާ މި ބައްދަލުވުމަށް "ލޮކްހީޑް މާޓިން" އާއި "ރޭތިއަން" ފަދަ ދުނިޔޭގެ ނުފޫޒުގަދަ ދިފާއީ ކުންފުނިތަކަށް ވަނީ ދައުވަތު ދީފައެވެ. މި ބައްދަލުވުމުގެ މައިގަނޑު ބޭނުމަކީ ހަތިޔާރު އުފައްދާ މިންވަރު މިހާރަށްވުރެ އިތުރުކޮށް، މަސައްކަތް ހަލުވިކުރުމަށް އެ ކުންފުނިތަކަށް ބާރުއެޅުމެވެ.

މިފަދަ ބައްދަލުވުމެއް ބާއްވަން ނިންމާފައިވަނީ އިރާނަށް ދިން ހަމަލާތަކުގެ އިތުރުން ޔޫކްރެއިން އަދި ގައްޒާގައި ހިނގަމުންދާ ހަނގުރާމަތަކުގެ ސަބަބުން އެމެރިކާގެ ހަތިޔާރުގެ ސްޓޮކް ވަރަށް ބޮޑަށް ދަށްވެފައިވާ ކަމަށް ބެލެވޭ ދަނޑިވަޅެއްގައެވެ. ޕެންޓަގަނުން މިހާރު ދަނީ މި ރިޒާވް އަވަހަށް ފުރިހަމަކުރެވޭނެ ގޮތްތަކެއް ހޯދަމުންނެވެ.

އެމެރިކާގެ ރައީސް ޑޮނަލްޑު ޓްރަމްޕް ހޯމަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އެމެރިކާގެ ހަތިޔާރުގެ ސަޕްލައި "ހުސްނުވާނެ" ކަމަށެވެ.