ހުޅުމާލެ ފޭސް 2 ގެ ހިޔާ ޓަވަރެއްގައި ރޭ ހިނގި އަލިފާނުގެ ހާދިސާގައި 38 އެޕާޓްމަންޓަކަށް ގެއްލުންވެ، 85 މީހަކަށް ވަގުތީ ބޯހިޔާވެހިކަން ހަމަޖައްސާފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

އެންޑީއެމްއޭ އިން ބުނީ ހިޔާ ފަސްވަނަ ޓަވަރުގައި ހިނގި އަލިފާނުގެ ހާދިސާގައި ގެއްލުންވީ 38 އެޕާޓްމަންޓެއްގެ ނަރުދަމާ ހޮޅިއަށް ކަމަށާއި އެކަން ރަނގަޅު ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މަސައްކަތް ކުރަމުންދާ ކަމަށެވެ.

ގެއްލުންވި އެޕާޓްމަންޓްތަކުގެ ތެރެއިން އެހީތެރިކަން ބޭނުންވި 18 އެޕާޓްމަންޓެއްގައި ދިރިއުޅޭ 85 މީހަކަށް ވަގުތީ ބޯހިޔާވެހިކަން ފޯރުކޮށްދިނުމުގެ އިތުރުން ކެއުން ބުއިމަށް އެހީތެރިކަން ފޯރުކޮށްދިން ކަމަށް އެންޑީއެމްއޭ އިން ބުންޏެވެ.

"މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީ އިން ދަނީ ކުރަމުންނެވެ. އަދި އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީ އާއި މި އޮތޯރިޓީން މި ދަނީ ބަލަމުން،" އެންޑީއެމްއޭއިން ބުންޏެވެ.

އެމްއެންޑީއެފް އިން ބުނީ ރޭ 18:33 ހާއިރު ހިނގި އެ އަލިފާނުގެ ހާދިސާ ހިނގީ ހިޔާގެ ފަސް ވަނަ ޓަވަރުގެ ނުވަ ވަނަ ފަންގިފިލާ އާއި 14 ވަނަ ފަންގިފިލާއާ ދެމެދުގެ ވައިގޮޅީގައި ހުރި އޭސީ އައުޓްޑޯ ޔުނިޓެއްގައި ކަމަށެވެ.

މި ހާދިސާގެ ސަބަބުން ޓަވަރުގެ ވައިގޮޅީގައި ހުންނަ ފެންހޮޅިތަކަށް ވަރަށް ބޮޑެތި ގެއްލުން ލިބުނު ކަމަށް އެމްއެންޑީއެފް އިން ބުންޏެވެ.

ހާދިސާގައި އެއްވެސް މީހަކަށް ގެއްލުން ނުވާއިރު، މައްސަލަ ދަނީ ތަހުގީގު ކުރަމުންނެވެ.