ރާއްޖޭގެ ރައީސުލްޖުމްހޫރިއްޔާ މުހައްމަދު މުއިއްޒު ހަމްބޯލްޓް ޔުނިވާސިޓީ އޮފް ބާލިންގައި ތަގުރީރުކުރަން ހަމަޖެހިއްޖެ އެވެ.

އެ ޔުނިވާސިޓީގައި މުއިއްޒު ތަގުރީރު ކުރައްވަން ހަމަޖެހިފައި ވަނީ އަންނަ ފެބްރުއަރީ 11، ވަނަ ދުވަހު އެވެ. އެމަނިކުފާނު ތަގުރީރު ކުރައްވަން ހަމަޖެހިފައި ވަނީ 'ކްލައިމެޓް ޗޭންޖް ވިތައުޓް ބޯޑާސް؛ ދިވެހިރާއްޖޭގެ ތަޖުރިބާ' މި މައުލޫއަށެވެ.

އެ ތަގުރީރުގައި މޫސުމީ ބަދަލުތަކަށް ހޭނުމަށް ރާއްޖެއިން ގެންގުޅޭ އުސޫލުތަކާއި އެ ދާއިރާއިން ބައިނަލްއަގުވާމީ މުޖުތަމައުއަށް ލިބިދެވޭނެ މުހިންމު ފިލާވަޅުތަކަށް އެމަނިކުފާނު އަލިއަޅުއްވައިލައްވާނެ ކަމަށް ހަމްބޯލްޓް ޔުނިވާސިޓީން ބުންޏެވެ.

މުއިއްޒުގެ އިތުރުން އެ ބައްދަލުވުމުގައި އެ ޔުނިވާސިޓީގެ ދެ ޕްރޮފެސަރުން ކަމަށްވާ، ޕްރޮފެސަރު، މާސެލް ރޮބިޝަން އަދި ޑރ. އެކްސެލް ކްލީ ބައިވެރިވެވަޑައިގެން މޫސުމީ ބަދަލުތަކާ ދެކޮޅަށް ބައިނަލްއަގުވާމީ މުޖުތަމައުއިން ގެންގުޅޭ ސިޔާސަތުތަކާއި، އެންމެންގެ އެއްބާރުލުމުގެ މުހިންމުކަމުގެ އިތުރުން އެކަމާ ގުޅިގެން އިލްމީ ދާއިރާއިން ކުރެވޭ އުއްމީދުތަކާ ބެހޭގޮތުން ވެސް މަޝްވަރާ ކުރައްވާނެ ކަމަށް އެ ޔުނިވާސިޓީން ބުންޏެވެ.

އެ ޔުނިވާސިޓީގައި ތަގުރީރު ކުރެއްވުމަށް މުއިއްޒު ގަރުމަނަށް ފުރާވަޑައިގަންނަވާ ދުވަހެއް އަދި ނޭނގެ އެވެ.