ވިހި އަހަރުން ދަށުގެ ގައުމީ ފުޓްބޯޅަ ޓީމަށް ކުޅުންތެރިން ހޮވުމަށް އޯޕަން ޓްރަޔަލެއް ބާއްވާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

އެފްއޭއެމް އިން އިއްޔެ މީޑިއާ އަށް މައުލޫމާތު ދިން ގޮތުގައި، ރާއްޖޭގެ 20 އަހަރުން ދަށުގެ ގައުމީ ފިރިހެން ފުޓްބޯޅަ ޓީމަށް ކުދިން ހޮވުމަށް ބާއްވާ އޯޕަން ސިލެކްޝަން ޓްރަޔަލް މާދަމާ ކުރިއަށްދާނެ އެވެ.

އެ ގޮތުުން މި ސިލެކްޝަން ޓްރަޔަލް ކުރިއަށްދާނީ މާދަމާ 15:30 އިން 18:00 އަށް ގަލޮޅު ރަސްމީ ފުޓްބޯޅަ ދަނޑުގަ އެވެ. މި ސިލެކްޝަން ޓްރަޔަލްގައި ބައިވެރިވެވޭނީ، 2007 2008 އަދި 2009 ގައި އުފަންވެފައިވާ ކުދިންނަށް ކަމަށް އެފްއޭއެމް އިން ވަނީ ބުނެފަ އެވެ.

މިއީ، ރާއްޖޭގެ 20 އަހަރުން ދަށުގެ ގައުމީ ފުޓްބޯޅަ ޓީމަށް ހާއްސަ ވެގެންދާނެ އަހަރެކެވެ. އެ ގޮތުން، ސާފް އިން މި އަަހަރުގެ 20 އަހަރުން ދަށުގެ ސާފް ފުޓްސަލް މުބާރާތް ހޯސްޓް ކުރުމުގެ ފުރުސަތު ދީފައިވަނީ ރާއްޖެ އަށެވެ. އެ ގޮތުން، މި ބާއްވާ ސިލެކްޝަނުން ހޮވޭ ކުޅުންތެރިން ގައުމީ ފައިނަލް ސްކޮޑުން ޖާގަ ހޯދައިފިނަމަ، އަމިއްލަ ގައުމުގައި ކުޅޭ ފުރަތަމަ އުމުރުފުރާ ސާފް މުބާރާތުގައި ކުޅުމުގެ ފުރުސަތު ލިބިގެންދާނެ އެވެ.

މި އަހަރު މާލޭގައި ބާއްވަން ނިންމާފައިވާ ދެކުނު އޭޝިއާގެ ގައުމުތަކުގެ 20 އަހަރުން ދަށުގެ ފުޓްބޯޅަ މުބާރާތުގައި، ރާއްޖޭ ލައްވާލީ ހަތަރު ޓީމު ވާދަކުރާ ގްރޫޕްގަ އެވެ. އެ ގޮތުން، ރާއްޖެ ހިމެނޭ ގްރޫޕްގައި ދެން އޮތީ ނޭޕާލް، ބޫޓާން އަދި ސްރީ ލަންކާ އެވެ. އަދި، ގްރޫޕް ބީގައި ހިމެނެނީ، ބަންގްލަދޭޝް އާއި އިންޑިއާ އަދި ޕާކިސްތާން އެވެ.

ސާފްގެ އުމުރުފުރާ މުބާރާތެއް ފުރަތަަމަ ފަހަރަށް ރާއްޖޭގައި ހޯސްޓްކުރުމުގެ ފުރުސަތު ލިބިފައިވާއިރު، ސާފް 20 އަހަރުން ދަށުގެ މުބާރާތް ކުރިއަށްދާ ގޮތަށް އޭރު އިއުލާނުކޮށްފައިވަނީ މި އަހަރުގެ މާޗް މަހުގެ 22 އިން ފެށިގެން އޭޕްރީލް 3 ގެ ނިޔަލަށް ކަމަށެެވެ.