އުމްރާނީ ތަރައްގީއަށް ލޯނު ދޫކުރަން ހާއްސަކޮށް ރައީސް މުހައްމަދު މުއިއްޒު 2024 ވަނަ އަހަރު ހުޅުވައިދެއްވި މޯލްޑިވްސް ޑިވެލޮޕްމެންޓް ބޭންކަށް ވިޔަފާރި ފެށުމަށް ބޭނުންވާ ހުއްދަ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކޮށްފި އެވެ.

ޑީބީއެމް ހިންގަން ބޭނުންވާ ލައިސެންސް މޯލްޑިވްސް މަނިޓަރީ އޮތޯރިޓީން ދޫކުރީ އަހަރެއްގެ ތެރޭގައި ބޭންކިން ހިދުމަތް ދިނުމަށް ޝަރުތު ކުރުމަށް ފަހު އޮކްޓޯބަރު 13، 2024, ގައި އެވެ.

ވިޔަފާރި ފެށުމުގެ ހުއްދަ ދޫކޮށްފައި މިވަނީ އެ ލައިސެންސް ދޫކުރިތާ 470 އަށްވުރެ ގިނަ ދުވަސް ފަހުންނެވެ.

ނޮވެމްބަރު 2024، ގައި އެ ބޭންކު ހުޅުވައި މި ސަރުކާރުގެ ފުރަތަމަ އެއް އަހަރުގެ ކާމިޔާބީތަކުގެ ތެރޭގައި އެކަން ފާހަގަކުރި ނަމަވެސް މިއަދާ ހަމައަށް ވެސް އެ ތަނުން އެއްވެސް ހިދުމަތެއް ދޭން ފަށައިފައެއް ނުވެ އެވެ.

ޑިވެލޮޕްމަންޓު ބޭންކު އުފައްދަވަން ރައީސް މުއިއްޒު ނިންމެވީ މެއި 2024، ގަ އެވެ. އެ ބޭންކު ހުޅުވާނެ ކަމަށް ސަރުކާރުން އެންމެ ފުރަތަމަ ބުނީ 2024 ވަނަ އަހަރުގެ ޖުލައި މަހުގެ ތެރޭގަ އެވެ. ނަމަވެސް އެކި ސަބަބުތަކާ ހުރެ ލަސްވަމުން ގޮސް، ނޮވެމްބަރު 16، ގައި އެ ތަން ހުޅުވިއިރު ވެސް އެތަނުގެ މަސައްކަތްތައް އެއްކޮށް ނުނިމެ އެވެ.