ކުރީގެ ސަރުކާރުން އިންޑިއާއާއެކު ހެދި އަސްކަރީ އަދި ސްޓްރެޓީޖިކް އެއްބަސްވުންތައް ދިރާސާކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް ހުށަހެޅި މައްސަލަ، އެއްވެސް ކުރިއެރުމެއް ނުލިބި ތާށިވެފައި އޮންނަތާ ދޮޅު އަހަރަކަށް ވުރެ ގިނަ ދުވަސް ވެއްޖެއެވެ.

ހިތަދޫ މެދު ދާއިރާގެ މެންބަރު އަހްމަދު އަޒާން ޖޫން 10، 2024 ގައި ހުށަހެޅުއްވި މި މައްސަލަ ބެލުމަށް އެ ދުވަހު ކޮމިޓީން ނިންމައި ހަތަރު މެންބަރުންގެ ސަބް ކޮމިޓީއެއް އެކުލަވައިލިއެވެ. އެ ކޮމިޓީން ބަލަން ނިންމާފައިވަނީ ހައިޑްރޯގްރަފީ އެއްބަސްވުމާއި، އުތުރު ތިލަފަޅު އަދި ޑޯނިއާ މަތިންދާ ބޯޓާ ގުޅޭ އެއްބަސްވުންތަކުގެ މައްސަލައެވެ.

މި މައްސަލަ ބެލުމަށް އެކުލަވައިލި ސަބް ކޮމިޓީގައި ތިއްބަވަނީ ދިއްގަރު ދާއިރާގެ މެންބަރު އަހްމަދު ނާޒިމް، ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ، ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު އަދި މައްސަލަ ހުށަހެޅުއްވި އަހްމަދު އަޒާންއެވެ.

މި މައްސަލަ މަޖިލީހުގައި ތާށިވެފައި އޮތީ ރައީސް މުހައްމަދު މުއިއްޒުގެ ނުފޫޒުން ކަމަށް މަޖިލީހުގެ ބައެއް މެންބަރުން ވިދާޅުވި އެވެ. އަދަދު ނޫހާ ވާހަކަ ދެއްކެވި ޕީއެންސީއަށް ނިސްބަތްވާ ބައެއް މެންބަރުން ވެސް އެހެން ވިދާޅުވި އެވެ.

"މި މައްސަލަ ހުށަހެޅިކަން އެނގިވަޑައިގެންނެވުމުން ރާއްޖޭން ބޭރުގައި ހުންނަވާފައި ރައީސް ގުޅުއްވި. އެ މަނިކުފާނު ކަންބޮޑުވުން އޮތް އެކަން އެގޮތަށް ކުރެއްވީމަ. އެހެންވެ، މައްސަލަ ހުއްޓިފައި އެ އޮތީ،" ޕީއެންސީގެ މެންބަރަކު ވިދާޅުވި އެވެ.

"އެ ނޫން ކޮން ކަމެއްތޯ ދެން އޮންނާނީ. މަޖިލީހުގެ ގަވާއިދުން ކުރިއަށް ގެންދަންޖެހޭ މައްސަލައެއް އެއީ. ރައީސް ބޭނުންފުޅުވާ އެހެން ކަންކަން އެބަ ހިނގާ. މި މައްސަލަ ނުހިނގާ އޮތީ."

މި މައްސަލަ ހުށަހެޅުއްވި ދުވަހު ކޮމިޓީގައި ވާހަކަ ދައްކަވަމުން އަޒާން ވިދާޅުވީ، ރިޔާސީ އިންތިހާބުގައި ރައްޔިތުން މި ސަރުކާރަށް ވޯޓު ދިން އެންމެ ބޮޑު ސަބަބަކީ ރާއްޖޭގެ މިނިވަންކަމަށް އުނިކަން އަންނަ ކަންތައްތަކެއް ހިނގާފައިވާ ކަމަށް ގަބޫލުކުރެވިގެން ކަމަށެވެ. އަދި ސަރުކާރު ހޯދަން ދެއްކި ވާހަކަތައް ތަހުގީގު ކުރުމަކީ ކޮމިޓީގެ ޒިންމާއެއް ކަމަށް އޭނާ ވިދާޅުވިއެވެ.

އިންޑިއާގެ އެއްބަސްވުންތައް ހާމަކުރާނެ ކަމަށާއި، ގައުމީ ސަލާމަތަށް ނުރައްކާ ވާގޮތަށް ހުރި އެއްބަސްވުންތައް އިސްލާހު ކުރާނެ ކަމަށް މުއިއްޒުގެ ސަރުކާރުން ބުނި ނަަމަވެސް އެއްވެސް އެއްބަސްވުމެއް މިހާތަނަށް ހާމައެއް ނުކުރެ އެވެ.

ރާއްޖޭގައި ގާއިމުކޮށްފައި އޮތް އިންޑިއާގެ އަޝްކަރިއްޔާ ބޭރުކުރާނެ ކަމަށް ރިޔާސީ އިންތިހާބުގައި ވައުދުވި ނަމަވެސް، ވެރިކަމަށް ވަޑައިގަތުމަށް ފަހު، ޔުނިފޯމު ލައިގެން ތިބި އިންޑިއާގެ ސިފައިންގެ ބަދަލުގައި ގެނައުމަށް މުއިއްޒު އެއްބަސްވީ އިންޑިއާގެ އަސްކަރިއްޔާގެ ދަށުން ހިންގާ ހިންދުސްތާން އޭރޮނެޓިކްސްގެ މުވައްޒަފުންނެވެ.

މިއީ މުއިއްޒު ރިޔާސީ އިންތިހާބުގައި ވައުދުވި ގޮތް ކަމަށް ނުވާތީ ގިނަ ބައެއްގެ ފާޑުކިޔުން އެމަނިކުފާނަށް އަމާޒުވި އެވެ.

ދިވެހި ގައުމުގެ އެންމެ ވެލިފުކަކަށްވެސް ގެއްލުންވާފަ އެއްބަސްވުމެއްގައި ނިމިދިޔަ އެމްޑީޕީގެ ސަރުކާރުން އިންޑިއާއާއެކު ސޮއިކޮށްފާ ނުވާނެ ކަމަށާއި އެއްބަސްވުންތައް ހާމަކުރަން ނުކުރޭ ސަބަބަކީވެސް އެއީ ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެފައިވެ އެވެ.

މި ސަރުކަރުން ވެސް އިންޑިއާއާއެކު އާ އެއްބަސްވުންތަކެއްގައި ސޮއިކޮށްފައިވާއިރު، އެ އެއްބަސްވުންތައް ވެސް ހާމައެއް ނުކުރެ އެވެ.