އިންޑިއާގެ ވެސްޓް ބެންގާލްގައި ފެތުރެމުންދާ ނިޕާ ވައިރަހުގެ ނުރައްކާ މިވަގުތު ރާއްޖެއަށް ކުޑަ ކަމަށާއި ހާލަތު މޮނީޓާ ކުރަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

އެޗްޕީއޭ އިން މިއަދު ނެރުނު ބަޔާނެއްގައި ބުނީ އިންޑިއާގައި ނިޕާ ވައިރަހަށް ޕޮޒިޓިވް ވި މީހުންނާއި ކޮންޓެކްޓުވި 180 އަށްވުރެ ގިނަ މީހުން ކަރަންޓީނުކޮށް، އެ މީހުންގެ ހާލަތު އެ ގައުމުގެ އިދާރާތަކުން ވަރަށް ގާތުން ބަލަމުންދާ ކަމަށެވެ.

ފުރަތަމަ ފެނުނު ކޭސްތައް ފިޔަވައި އިތުރު ކޭހެއް ނުފެންނައިރު އިންޑިއާ ނޫން އެހެން ގައުމަކުން ވެސް މި ބަލި މިހާތަނަށް ފެނިފައި ނުވާކަން އެޗްޕީއޭ އިން ފާހަގަކޮށްފައިވެ އެވެ.

ރާއްޖެއަށް ނުރައްކާ ކުޑަ ކަމަށާއި މި ބަލީގެ އެއްވެސް ކޭސް އެއް ރާއްޖެއިން ރިޕޯޓުކޮށްފައިނުވާ ކަމަށް އަދި ބަލި ޖެހިފައިވާ މީހަކާއި ކޮންޓެކްޓުވި މީހަކު ރާއްޖެ ނާންނަ ކަމަށް ވެސް އެ އެޖެންސީއިން ބުންޏެވެ. ނަމަވެސް، ބަލި ފެތުރިފައިވާ ވެސްޓް ބެންގާލް އަށް ދަތުރުކުރާ ދިވެހިން މިކަމަށް ސަމާލުކަން ދިނުމަށް އެދިފައިވެ އެވެ.

މީގެ އިތުރުން، މި ބައްޔާއި އެހެނިހެން ބަލިތަކާއި ދެކޮޅަށް އަޅަން ޖެހޭ ފިޔަވަޅުތައް ސިއްހީ ހިދުމަތްދޭ ތަންތަނާއި އިދާރާތަކާއި ގުޅިގެން ކުރަމުންދާ ކަމަށް އެޗްޕީއޭއިން ބުނެފައިވެ އެވެ.

މި ބަލި ފެތުރިފައިވާ އަވަށްޓެރި އިންޑިއާ އަކީ ރާއްޖެއަށް އެންމެ ގިނަ ޓޫރިސްޓުން އަންނަ އެއް ގައުމެވެ. އެ ގައުމުން މިދިޔަ އަަހަރު ވެސް ލައްކަ އަކަށްވުރެ ގިނަ ޓޫރިސްޓުން އައި އިރު މި އަހަރު ވެސް ރާއްޖެއަށް ހަ ވަނައަށް އެންމެ ގިނައިން ޓޫރިސްޓުން އައީ އެ ގައުމުންނެވެ.

ނިޕާ ވައިރަހަކީ ކޮބާ؟

ނިޕާ ވައިރަސް އެންމެ ފުރަތަމަ ފެނުނީ 1998 ވަނަ އަހަރު އެވެ. އެ ފަހަރު ވައިރަސް ފެތުރުނީ މެލޭޝިއާގައި އޫރު ގެންގުޅޭ ބައެއްގެ ތެރޭގަ އެވެ. ވައިރަހަށް ނަން ދިނީ އެންމެ ފުރަތަމަ ފެނުނު އަވަށަށް ނިސްބަތްކޮށްގެންނެވެ.

މި ވައިރަސް އާއްމުކޮށް ފެންނަނީ ވަރަށް މަދުންނެވެ. އެކަމަކު މިއީ ދުނިޔޭގައި ބަލިމަޑުކަމެއް ފެތުރުމުގެ ފުރުސަތު ބޮޑު ވައިރަހަކަށް ވާތީ އިތުރު ދިރާސާ ކުރުން މުހިއްމު ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ލިސްޓުކޮށްފައިވެ އެވެ.

އާއްމުކޮށް މި ވައިރަސް އިންސާނުންނަށް ފޯރަނީ ޖަނަވާރުންގެ ގައިން ނުވަތަ ތަގައްޔަރުވެފައިވާ ކާނާއިންނެވެ. އެކަމަކު އެއް އިންސާނެއްގެ ގައިން އެހެން އިންސާނެއްގެ ގަޔަށް ފޯރުމުގެ ފުރުސަތު ވެސް އޮވެ އެވެ.

އާއްމުކޮށް މި ވައިރަސް ފެންނަނީ ވާލުގެ ގައިންނެވެ. ދޭތެރެ ދޭތެރެއިން މި ބަލި ފެތުރެނީ ވާލުގެ ސަބަބުން ކަމަށް ބެލެވިފައިވެ އެވެ.

އަލާމާތްތަކުގެ ތެރޭގައި ގަދަޔަށް ހުން އައުން، ހޮޑުލެވުން، ނޭވާލާ ނިޒާމުގެ އިންފެކްޝަން ހިމެނެ އެވެ. ހާލު ގޯސްވެ ފިޓުޖެހި، ސިކުނޑި ދުޅަވެ، ކޯމާއަށް ދިޔުން ވެސް އެކަށީގެންވެ އެވެ.

ނިޕާ ވައިރަހަށް ވެކްސިނެއް ހޯދިފައެއް ނުވެ އެވެ.