ގދ. ފިޔޯރީ ކައުންސިލުން 18 މުވައްޒަފުން ނެގުމަށް އިއްޔެ އިއުލާން ކުރީ ލޯކަލް ގަވަމެންޓު އޮތޯރިޓީ (އެލްޖީއޭ) ގެ ހުއްދަ ލިބުމުންކަން އެނގިއްޖެ އެވެ.

ލޯކަލް ކައުންސިލް އިންތިހާބު ބޯމަތިވެފައިވަނިކޮށް ފިޔޯރީ ކައުންސިލުން 18 މުވައްޒަފުން ނެގުމަށް އިއުލާންކުރި ހަބަރު ބައެއް މީޑިއާތަކުގައި ޖެހުމުން އެ ކައުންސިލަށް ފާޑުކިޔުން އަމާޒުވި އެވެ. އެގޮތުން އެއީ ވަޒީފާ މެދުވެރިކޮށް އިންތިހާބަށް ނުފޫޒު ފޯރުވުމަށް ކުރާ ކަމެއް ކަމަށް ބައެއް ފަރާތްތަކުން ބުނެފައިވެ އެވެ.

އަދަދު ނޫހަށް ލިބިފައިވާ ލިޔެކިޔުންތަކުން އެނގޭ ގޮތުގައި ޖެނުއަރީ 18، ގައި އެ ވަޒީފާތަކަށް މީހުން ނެގުމަށް އިއުލާން ކުރުމުގެ ހުއްދައަށް އެލްޖީއޭގައި ފިޔޯރީ ކައުންސިލުން އެދިފައިވެ އެވެ.

"ސިވިލް ސާވިސްގެ ގަވާއިދާއި އުސޫލުތަކާ އެއްގޮތަށް" އެކަން ކުރިއަށްގެންދިޔުމުގެ ހުއްދަ އެލްޖީއޭގެ ސީއީއޯ މުހައްމަދު ނިމާލް ސޮއިކޮށް ފޮނުވި ސިޓީއަކުން އެ ކައުންސިލަށް ދިނީ ޖެނުއަރީ 21، ގަ އެވެ.

ފިޔޯރީ ކައުންސިލްގެ ރައީސް ފައިޒަރު ރަޝީދު ވިދާޅުވި ގޮތުގައި އެއީ ވޭޖު އުސޫލުން މިހާރު ވެސް އެ ކައުންސިލުގައި މަސައްކަތް ކުރަމުން އަންނަ މުވައްޒަފުންނެވެ. އޭގެ ތެރެއިން ބައެއް މީހުންގެ ކޮންޓްރެކްޓު މާޗު މަހަށް އަދި ބައެއް ކޮންޓްރެކްޓުތައް އެޕްރީލް މަހަށް ހަމަވާ ކަމަށް އޭނާ ވިދާޅުވި އެވެ.

"މުނިސިޕަލް މަސައްކަތަށް ނަގަން ޖެހޭ މުއައްޒަފުން ނެގުމަށް ނަގަންޖެހޭ ހުއްދަ ނެގުމަށް ފަހު ކުރެވުން އިއުލާނެއް،" ފައިޒަރު ވިދާޅުވި އެވެ.

އަންނަ ދައުރަށް ހޮވާ ފިޔޯރީ ކައުންސިލުގެ ރައީސްގެ މަގާމަށް އަމިއްލަ ގޮތުން ފައިޒަރު ކުރިމަތިލައްވަ އެވެ. ވެރިކަން ކުރާ ޕީއެންސީގެ ޓިކެޓުގައި އޭނާއާ ވާދަކުރަނީ ކޮންސްޓްރަކްޝަން މިނިސްޓަރު އަބްދުالله މުއްތަލިބުގެ އާއިލީ މީހެކެވެ.

މުހައްމަދު މުއިއްޒުގެ ސަރުކާރުން ލާމަރުކަޒީ ނިޒާމުގެ ބާރު ކަނޑުވައިލުމަށް ގެނައި ބަދަލުތަކުގެ ސަބަބުން ކައުންސިލްތަކުގެ މަސައްކަތްތަކަށް ބޮޑެތި ހުރަސްތަކަކާ ވަނީ ކުރިމަތިވެފަ އެވެ. އެގޮތުން، ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ވަނީ ބަންދުކޮށްފަ އެވެ. އެކަން ކުރެވެނީ އެލްޖީއޭގެ ހާއްސަ ހުއްދައެއްގެ ދަށުންނެވެ.

ކައުންސިލްތަކުން މުވައްޒަފުް ނެގުމަށް އިއުލާން ކުރުމުން ސަރުކާރުގެ ބައެއް ފަރާތްތަކުން ކަންބޮޑުވުން ފާޅުކުރަމުންދާއިރު މިނިސްޓްރީތަކަށާއި ސަރުކާރުގެ ކުންފުނިތަކުން ވަނީ އިންތިހާބާ ދިމާކޮށް އެތައް ސަތޭކަ ވަޒީފާއަށް އިއުލާންކޮށްފަ އެވެ.