މޯލްޑިވްސް ގޭސްގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި، ރުކުމާ މުހައްމަދު އަބްދުލްކަރީމް އެ މަގާމުން ވަކިކޮށްފި އެވެ.

އޭނާ އެ މަގާމުން ވަކިކޮށްފައިވާކަން މުއުތަބަރު ފަރާތަކުން އަދަދު އަށް ވަނީ ކަށަވަރު ކޮށްދީފަ އެވެ. ނަމަވެސް، އޭނާގެ ބަހެއް މިކަމާ ބެހޭ ގޮތުން އަދި ނުލިބެ އެވެ.

މުހައްމަދު އަބްދުލްކަރީމް މީގެ ކުރިން ހުންނެވީ ފެނަކަ ކޯޕަރޭޝަން ލިމިޓެޑުގެ ޑެޕިއުޓީ މެނޭޖިން ޑިރެކްޓަރުގެ މަގާމުގަ އެވެ. އެ މަގާމުގައި އޭނާ ހުންނަވަނިކޮށް މޯލްޑިވްސް ގޭސްގެ ޑީއެމްޑީގެ މަގާމަށް އޭނާ ބަދަލުކުރީ ޖުލައި 1، 2025 ގަ އެވެ.

މޯލްޑިވްސް ގޭސްގެ ޑީއެމްޑީގެ މަގާމުން މުހައްމަދު އަބްދުލްކަރީމް ވަކިކުރި ސަބަބެއް އަދި ނޭނގެ އެވެ. މީގެ ކުރިން އޭނާ ފެނަކައިގެ ޑީއެމްޑީގެ މަގާމުގައި ހުންނަވަނިކޮށް، މޯލްޑިވްސް ގޭސްއަށް ބަދަލުކުރި ސަބަބު ވެސް ރަސްމީކޮށް އެއްވެސް ފަރާތަކުން ހާމައެއް ނުކުރެ އެވެ.

މޯލްޑިވްސް ގޭސްގެ ޑީއެމްޑީގެ މަގާމުން މުހައްމަދު އަބްދުލްކަރީމް ވަކިކުރިއިރު، ސަރުކާރުގެ ގޭސް ކުންފުންޏަށް އެސްޓީއޯއިން އެތެރެކުރާ ގޭސް ހުސްވެ، މި ވަގުތު ގޭސް ގަންނަމުން ދަނީ ވިލާ ކުންފުނިންނެވެ. އެންމެ އަވަހަށް ވެސް މޯލްޑިވްސް ގޭސްއަށް ގޭސް ޝިޕްމެންޓެއް ލިބޭނެ ކަމަށް ބެލެވެނީ ފެބްރުއަރީ 15، ގައި ކަމަށް މައުލޫމާތު އެނގޭ މީހުން މި ނޫހަށް މައުލޫމާތު ދީފައިވެ އެވެ.