ދިވެހިރާއްޖޭގެ އިދާރީ ދާއިރާތައް ހިންގުމުގައި ކަނޑައަޅާފައިވާ ލާމަރުކަޒީ އުސޫލުތަކުގެ ތެރެއިން، ހުޅުމާލެއަކީ މާލޭ ސިޓީ ކައުންސިލްގެ މަސްއޫލިއްޔަތުތަކުން ބަރީޢަކުރެވޭނެ ތަނެއް ނޫން ކަމަށް މާލޭ ސިޓީގެ މޭޔަރުކަމަށް ވާދަކުރައްވާ ޒަރިޔަންދު ވިދާޅުވެއްޖެއެވެ.

ކުރީގެ ރައީސް އަބްދުﷲ ޔާމީންގެ ތާއިދާއެކު، ނަމަވެސް އަމިއްލަ ގޮތުން އިންތިހާބުގައި ވާދަކުރާ ޒަރިޔަންދު މިހެން ވިދާޅުވީ، މާލޭގެ އިދާރީ އޮނިގަނޑާއި ހުޅުމާލޭގެ ހިންގުމާ ގުޅޭގޮތުން އެކްސްގައި ކުރެއްވި ޕޯސްޓެއްގައެވެ.

ޒަރިޔަންދު ފާހަގަ ކުރެއްވި ގޮތުގައި، ގާނޫނު އަސާސީގެ 230 ވަނަ މާއްދާގެ (ހ) އިން ރާއްޖޭގެ އިދާރީ ދާއިރާތައް ހިންގަންވާނީ ލާމަރުކަޒީ އުސޫލުންކަން ސާފުކޮށް އެނގެން އޮތްއިރު، ގާނޫނު އަސާސީގެ ޖަދުވަލު 2 އާއި، ލާމަރުކަޒީ ގާނޫނު (7/2010) ގެ 4 ވަނަ މާއްދާގެ (ށ) ގައި ބަޔާންކުރާ ގޮތުން، މާލޭގެ އިދާރީ ދާއިރާގެ ތެރޭގައި މާލެ، ހުޅުމާލެ އަދި ވިލިނގިލި ހިމެނެއެވެ.

ލާމަރުކަޒީ ގާނޫނުގެ 40 ވަނަ މާއްދާއިން ސިޓީ ކައުންސިލަށް މަތިކޮށްފައިވާ މުނިސިޕަލް އަދި އިދާރީ މަސްއޫލިއްޔަތުތަކަކީ، ސަރުކާރުން ބޭނުންވުމުން ހަވާލުކޮށްފައި، ބޭނުން ނުވުމުން އަތުލެވޭނެ "އިހުތިޔާރީ" ކަމެއް ނޫން ކަމަށް ޒަރިޔަންދު ވިދާޅުވި އެވެ.

ހުޅުމާލެއަކީ މާލޭގެ އިދާރީ ދާއިރާގެ ބައެއް ކަމަށްވާއިރު، އެތަނުގެ ހިންގުން ކައުންސިލްގެ ދާއިރާއިން ބޭރުކުރުމަކީ ގާނޫނީ ރޫހާ ހިލާފު ކަމެއްގެ ގޮތުގައި އޭނާ ވިދާޅުވި އެވެ.

ޒަރިޔަންދު ވިދާޅުވީ އޭނާގެ މޭޔަރުކަމެއްގައި ހުޅުމާލޭގެ ރައްޔިތުންނަށް ދޭން ނިންމާފައިވާ އެންމެ ބޮޑު ޔަގީންކަމަކީ، އެ އަވަށުގެ ހިންގުން ރައްޔިތުންގެ ބައިވެރިވުމާއެކު ސިޓީ ކައުންސިލްގެ ދަށަށް ގެނައުމެވެ. މިގޮތުން ކުރައްވާނެ މައިގަނޑު ކަންތައްތަކަކީ؛ ހުޅުމާލޭގައި އަވަށު ކޮމިޓީތައް އުފައްދުމެވެ.

"އަޅުގަނޑުގެ މޭޔަރުކަމެއްގައި ހުޅުމާލޭގައި އުފެދޭނެ އަވަށު ކޮމިޓީތަކުން ބޭނުންވާގޮތަށް އެ މަސްޢޫލިއްޔަތާއި ހަވާލުވުމުގެ ޝަރުޢީ އަދި އިންތިޒާމީ ހަރަކާތްތައް ކުރިޔަށް ގެންދާނަން،" އޭނާ ވިދާޅުވި އެވެ.

ހުޅުމާލޭގެ ފުރިހަމަ އިހުތިސާސް ކައުންސިލަށް ހޯދުމަށްޓަކައި ކުރަންޖެހޭ ގާނޫނީ ބަހުސްތަކާއި، އިދާރީ ގޮތުން ކުރަންޖެހޭ ހުރިހާ މަސައްކަތެއް ކުރިޔަށް ގެންދާނެ ކަމަށް ވެސް ޒަރިޔަންދު ޔަގީންކަން ދެއްވި އެވެ.

ހުޅުމާލޭގެ މުނިސިޕަލް ހިދުމަތްތައް ސިޓީ ކައުންސިލަށް ބަދަލު ކުރުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. ނަމަވެސް އެ ވައުދު ފުރިހަމަނުކުރައްވައި، އެންމެ ފަހުން ވިދާޅުވެފައި ވަނީ ހުޅުމާލޭގެ މުނިސިޕަލް ހިދުމަތްތައް މާލެ ސިޓީ ކައުންސިލުގެ ދަށަށް ބަދަލު ނުކުރެވިގެން އުޅެނީ އެ ކައުންސިލުން އެ ހިދުމަތާ ހަވާލުވާން ދެކޮޅު ހެދުމުން ކަމަށެވެ.

އެކަމާ ގުޅޭ ގޮތުން މާލޭ މޭޔަރު އާދަމް އާޒިމް ވިދާޅުވީ މުއިއްޒު ހެއްދެވީ ބުހުތާނު ދޮގެއް ކަމަށެވެ.

"މާލެ ސިޓީ ކައުންސިލުން މިކަމާ ހަވާލުނުވެގެނެއް ނޫން މިއުޅެނީ، ސީދާ ރައީސުލްޖުމްހޫރިއްޔާ އެކަން ކުރަން ބޭނުންފުޅު ނުވާތީ އެކަން ނުކުރެވިގެން މިއުޅެނީ، ދެން އެޗްޑީސީގެ މައްސަލައެއް ނޫން މިއުޅެނީ ސީދާ ރައީސުލްޖުމްހޫރިއްޔާގެ މައްސަލައެއް މިއުޅެނީ މިކަން ނުކުރާންވެގެން،" އާޒިމް ވިދާޅުވެފައިވެ އެވެ.