ތައިލެންޑުގައި މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ އަންހެން ޑިވިޝަނުގައި ވާދަކުރާ ރާއްޖޭގެ ޓީމުގެ ޓާގެޓް ހާސިލްކުރުުމުގެ އުންމީދު އަދިވެސް އެބައޮތް ކަމަށް ޓީމުގެ ކޯޗު، އާތިފް މުހައްމަދު (އާތީ) ބުނެފި އެވެ.

މުބާރާތުގައި ރާއްޖޭން ކުޅުނު ފުރަތަމަ މެޗުގައި، އިންޑިއާ އަތުން 11-1 އިން ބަލިވިއިރު، ދެ ވަނަ މެޗުގައި ނޭޕާލް އަތުން ވަނީ 5-0 އިން ބަލިވެފަ އެެވެ. އަދި، ތިން ވަނަ މެޗުގައި، ޕާކިސްތާން އަތުން 3-1 އިން ބަލިވިއިރު، މެޗުން މެޗަށް ރާއްޖޭގެ ޓީމުން އަންނަނީ ކުރިއެރުން ހޯދަމުންނެވެ.

ރާއްޖޭގެ އަންހެން ފުޓްސަލް ޓީމުން މިރޭ ބޫޓާނާ ކުޅޭއިރު، މި މެޗަށް މި ނުކުންނަނީ ތިން ދުވަހުގެ ބްރޭކަކަށް ފަހު އެވެ. ބޫޓާން މެޗު ހިމެނޭ ގޮތަށް މިހާރު ރާއްޖެ އަށް ބާކީ އޮތީ ތިން މެޗެވެ. އެއީ، ބޫޓާންގެ އިތުރުން ސްރީ ލަންކާ އާއި ބަންގްލަދޭޝާ ދެކޮޅަށް ފަހު ކުޅޭ މެޗުތަކެވެ.

ޓީމުގެ ފަރިތަކުރުންތަކުގެ ތެރެއިން، "އަދަދު ސްޕޯޓްސް" އަށް އާތީ ބުނީ، މުބާރާތް ފެށުނުއިރު، ރާއްޖެ އޮތް ހިސާބަށް ބަލާއިރު މިހާރު ބޮޑުތަނުން ކަންކަން ރަނގަޅުކުރެވިފައިވާނެ ކަމަށެވެ. އަދި، އިންޑޯ ޕިޗަށް ހޭނި ވަރަށް ރަނގަޅަށް ކުޅެން މަސައްކަތް ކުރަމުން އަންނަ ކަމަށް އާތީ ފާހަގަކުރި އެވެ.

އޭނާ ބުނީ، މުބާރާތަށް އައިއިރު ހާސިލްކުރަން ކަނޑައެޅި ޓާގެޓަށް ވާސިލްވުމުގެ މަސައްކަތުގައި ދެމިތިބި ކަމަށެވެ.

"މި ކޮޅަށް އައިއިރުގައި ވެސް އަޅުގަނޑުމެން އައީ ވިސްނައިގެން މެޗެއް ނޫނީ ދެ މެޗެއް ނަގަން، އިރާދަކުރެއްވިއްޔާ، އެ ވިސްނުމުގައި މި ދަނީ ކުރިއަށް، އަޅުގަނޑުމެންނަށް މި ލެވަލްގައި އައިސްފައި، ކުއްލިއަކަށް ޕްރެކްޓިސްތަކާ އެއްޗެހި ނުކޮށް، އިންޑޯއާ އެއްޗެހި ނެތި، ހުރިހާ އެހެން ޓީމުތަކުން އިންޑޯގައި ޕްރެކްޓިސް ކުރަމުންދާއިރު އެކަން ނެތި އައިސްފައި، އެ ހަމަ ފައިޓެއް ނުކުރެވޭނެ، އެކަމަކު އިންޑޯއެއްގައި ގިނަ ދުވަހެއްގައި ޓްރެއިނިން ހަދާފައި އައިސްފި ކަމަށްވެއްޖިއްޔާ، މީތި ހަމަ ވަރަށް ރަނގަޅު ހިސާބަަކަށް ދިއުމުގެ ފުރުސަތު ބޮޑު،" އާތީ ބުންޏެވެ.

ރާއްޖޭގެ ޓީމުން އެންމެ ފަހުން ޕާކިސްތާނާ ދެކޮޅަށް ކުޅުނު މެޗުގައި ރަނގަޅަށް ކުޅެ، ލަނޑު ޖަހާނެ ގިނަ ފުރުސަތުތަކެއް ހޯދި އެވެ. ރާއްޖެ ޓީމުން މެޗުން މެޗަށް ކުޅުމަށް ބަލާއިރު، ކުރިއެރުން ހޯދި ނަމަވެސް، ހައްލުނުވެ އޮތީ ގޯލު ޖަހަން ލިބޭ ފުރުސަތުތައް އިތުރުވި ކަމުގައި ވިޔަސް ގޯލު ކާމިޔާބުކުރެވޭ ނިސްބަތް އިތުރު ނުކުރެވުމެވެ. ރަނގަޅުކުރަން ޖެހޭ ކަމެއްގެ ގޮތުގައި އާތީ ވެސް ފާހަގަކުރީ ލަނޑު ޖަހަން ލިބޭ ފުރުސަތު އަވަހަށް ނިންމާލުމެވެ.

"މިހާރު އޮތް ހާލަތަށް ބަލާއިރު، އެންމެ ބޮޑަށް އިމްޕްރޫވްކުރަން ޖެހެނީ ފިނިޝިން، އެއީ މިދިޔަ އެންމެ ފަހު މެޗުގައި ގިނަ ޗާންސް ލިބިގެންދިޔައީ އަޅުގަނޑުމެންނަށް އެހެން ނަމަވެސް އޭތި ނިންމާނުލެވުމުގެ ސަބަބުން އޭތި އެކޮޅަށް އެނބުރިފައި އެ ހުރީ، ފިނިޝިން މައްސަލަ ރަނގަޅުކޮށްފިއްޔާ، ސްކޯ މައްޗަށް ހިއްލާލެވޭނެ ކަމަށް ގަބޫލުކުރަނީ،" އާތީ ބުންޏެވެ.

ބޫޓާނާ ދެކޮޅަށް ކުޅޭ މެޗަށް ނުކުންނައިރު، ރާއްޖޭގެ އެއް ކުޅުންތެރިއަކު ހުރީ ސަސްޕެންޝަނުގަ އެވެ. ބޫޓާނުން ކުޅުުނު ފުރަތަމަ މެޗުގައި 1-1 އިން ޕާކިސްތާނާ އެއްވަރުކުރިއިރު، ދެ ވަނަ މެޗުގައި، 3-3 އިން ބަންގްލަދޭޝާ އެއްވަރުކުރި އެވެ. އަދި، ތިން ވަަނަ މެޗުގައި، ސްރީ ލަންކާ އަތުން 5-1 އިން ވަނީ މޮޅުވެފަ އެވެ.

ރާއްޖެ އާއި ބޫޓާން ކުޅޭ މެޗު ފަށާނީ މިއަދު ރާއްޖެ ގަޑިން 18:00 ގަ އެވެ.