އެޕްރީލް 4، ގައި ބާއްވާ ލޯކަލް ކައުންސިލް އިންތިހާބުގައި ވޯޓު ދިނުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ މުއްދަތު ހަމަވިއިރު ހުށަހެޅީ 779 ޝަކުވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި އީސީގެ މެންބަރު ހަސަން ޒަކަރިއްޔާ ވިދާޅުވީ ގާނޫނުގައި ބަޔާންކުރާ ގޮތަށް ވޯޓާސް ލިސްޓަށް ޝަކުވާ ހުށަހެޅުމަށް 10 ދުވަހުގެ މުއްދަތު އިއްޔެ މެންދުރުފަހު 15:00 ޖެހިއިރު ހަމަވިއިރު ހުށަހެޅީ ޖުމްލަ 779 ޝަކުވާ ކަމަށެވެ.

"ޝަކުވާގެ މުއްދަތު ހަމަވިއިރުގައި 779 ޝަކުވާއެއް އަޅުގަނޑުމެންނަށް ލިބިފައި އެބަ އޮތް ޖުމްލަ 10 ދުވަހުގެ މުއްދަތުގެ ތެރޭގައި. ގާނޫނުގައި ބަޔާންކޮށްފައި މިއޮންނަނީ ޝަކުވާ ހުށަހެޅުމަށްޓަކައި 10 ދުވަސް ދޭންވާނެ ކަމަށް،" އޭނާ ވިދާޅުވި އެވެ.

ޒަކަރިއްޔާ ވިދާޅުވީ ޖުމްލަ ގޮތެއްގައި ވަގުތީ ވޯޓާސް ލިސްޓަށް އެންމެ ގިނައިން އައިސްފައި ހުރީ އެޑްރެސް ބަދަލުވުމުގެ ޝަކުވާ ކަމަށެވެ. އޭނާ ވިދާޅުވީ އެގޮތަށް ޝަކުވާތައް ގިނަވަނީ ސިޓީތަކުގައި އިންތިހާބީ ދާއިރާތައް ބައިވެފައި އޮތުމުން އެއް އަވަށުން އަނެއް އަވަށަށް ބަދަލުވާތީ ކަމަށެވެ.

"ސިޓީތަކުގައި އިންތިހާބީ ދާއިރާތައް ބައިވެފައި އޮތީމަ އެއް އަވަށުން އަނެއް އަވަށަށް، އެއް ސަރަހައްދުން އަނެއް ސަރަހައްދަށް ރަޖިސްޓްރީ ބަދަލުކުރުމުގެ ކަންތައްގަނޑު ވަރަށް ބޮޑަށް ހިނގާ،" އޭނާ ވިދާޅުވީ އެވެ.

އެޑްރެސް ބަދަލުވެފައި ހުރުމުގެ ޝަކުވާތަކާ ގުޅިގެން އެކަންތައް ބެލުމަށް ނެޝަނަލް ރަޖިސްޓްރޭޝަނަށް ފޮނުވާފައިވާކަން ފާހަގަކުރައްވާ ޒަކަރިއްޔާ ވިދާޅުވީ އެ ބަދަލުތައް ނެޝަނަލް ރަޖިސްޓްރޭޝަނުން ގެންނަ ގޮތެއްގެ މަތިން ލިސްޓަށް ބަދަލު ގެންނާނެ ކަމަށެވެ.

މީގެއިތުރުން ރަށްވެހިކަން ބަދަލުވެފައި ހުރިކަމުގެ ޝަކުވާތައް ވެސް ކޮންމެވެސް ވަރަކަށް އައިސްފައި ހުރިއިރު، މަރުވެފައި ތިބި މީހުން ލިސްޓުގައި ހުރުމުން އުނިކުރުމަށް ވެސް ޝަކުވާތަކެއް ހުށަހަޅާފައިވާ ކަމަށް ޒަކަރިއްޔާ ވިދާޅުވި އެވެ.

ޒަކަރިއްޔާ ވިދާޅުވީ އީސީއަށް ލިބިފައިވާ ޝަކުވާތަކާ ގުޅިގެން ލިސްޓަށް ގެންނަން ޖެހޭ ބަދަލުތައް ގެނެސް، އިދާރީ ގޮތުން ދޭން ޖެހޭ ޖަވާބުތައް ދިނުމުގެ މަސައްކަތް ކުރަމުންދާ ކަމަށެވެ. އޭގެއިތުރުން އޭނާ ވިދާޅުވީ ބަދަލުތައް ގެނައުމަށްފަހު ދާއިމީ ލިސްޓު ދެ ހަފްތާއެއްހާ ދުވަސް ތެރޭގައި އާންމުކުރާނެ ކަމަށެވެ.

ކައުންސިލް އިންތިހާބުގައި ވޯޓު ދިނުމުގެ ހައްގު ލިބިގެންވާ 294،937 މީހުންނެވެ. އޭގެތެރެއިން 150،410 މީހުންނަކީ ފިރިހެނުން ކަމަށްވާއިރު، 144،527 މީހުންނަކީ އަންހެނުންނެވެ. އިންތިހާބުގައި ޖުމްލަ 621 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ.

އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކުގެ މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުން އިންތިހާބުކުރާނެ އެވެ.