ދައުލަތުގެ ބަޖެޓުން އަމިއްލަ މީޑިއާތަކަށް ދޭ މާލީ އެހީތެރިިކަން (މީޑިއާ ގްރާންޓް) ދޫކުރާ ޕްރޮގްރާމުގެ ދަށުން 40 މީޑިއާއަކަށް 27.29 މިލިއަން ރުފިޔާ ޖަމާކޮށްފި އެވެ.

ޔޫތު މިނިސްޓްރީން ބުނީ ރައީސް މުހައްމަދު މުއިއްޒުގެ ވައުދާ އެއްގޮތަށް 40 މީޑިއާއަކަށް މީޑިއާ ގްރާންޓް ޖަމާކޮށް ނިމިފައިވާ ކަމަށެވެ.

މީޑިއާ ގްރާންޓުން އެންމެ ގިނައިން ފައިސާ ލިބެނީ މިހާރު ނޫހާއި އެ ނޫހުގެ އިނގިރޭސި ބައި ކަމަށްވާ ދަ އެޑިިޝަންއަށެވެ. މިހާރަށް 793،214.45ރ. ލިބޭއިރު، ދަ އެޑިޝަނަށް 633,292.18ރ. ލިބެ އެވެ. އެހެންކަމުން އެ ދެ މީޑިއާ އެއްކޮށްލުމުން 1،426،506.63ރ. ލިބެ އެވެ.

ފައިދާ ދޫކުރާ ޖުމްލަ 40 މީޑިއާގެ ތެރެއިން 1،081،074.53 މިލިއަން ރުފިޔާއާއެކު ދެވަނައަށް އެންމެ ގިނައިން ފައިސާ ލިބެނީ ސަންގު އޮންލައިނަށެވެ. ތިންވަނައަށް 1،068،280.75ރ. އާއެކު އެންމެ ގިނައިން ފައިސާ ލިބެނީ ސަންއަށެވެ.

ފައިސާ ލިބުނު އިތުރު މީޑިއާތަކާއި ލިބުނު ފައިސާގެ އަދަދު:

• ވީނިއުސް - 997،914.95ރ.
• އައިސް ޓީވީ - 908،358.48ރ.
• ދިވެހި ޗެނަލް - 876،374.03ރ.
• ވަގުތު - 754،833.10ރ.
• ވަން އޮންލައިން - 710،054.87ރ.
• ދައުރު - 697،261.09ރ.
• ކޯޕަރޭޓް މޯލްޑިވްސް މެގަޒިން - 690،864.20ރ.
• ވޮއިސް އެމްވީ - 690،864.20ރ.
• ގާފު އޮންލައިން - 678،070.42ރ.
• ހަލި ނިއުސް - 678،070.42ރ.
• އަސްލު ނިއުސް - 678،070.42ރ.
• ދަ ޕްރެސް - 665،276.63ރ.
• ދިޔަރެސް ނިއުސް - 658،879.74ރ.
• މުނިއަވަސް އޮންލައިން - 658،879.74ރ.
• ދެން އޮންލައިން - 658،879.74ރ.
• ދިލަދުން - 658،879.74ރ.
• ހަބަރު އޮންލައިން - 639،689.07ރ.
• ފަރަގު - 639،689.07ރ.
• ފިޔަ އޮންލައިން - 639،689.07ރ.
• ޖަޒީރާ ނިއުސް ހަބް - 633،292.18ރ.
• ދުވަސް - 633،292.18ރ.
• ދަ އެޑިޝަން - 633،292.18ރ.
• އިރުވަރު - 626،895.29ރ.
• ހަފްތާ - 620،498.40ރ.
• ތީރު މީޑިއާ - 620،498.40ރ.
• އައްޑޫ ލައިވް - 607،704.62ރ.
• މާލެ ޓައިމްސް - 601،307.73ރ.
• ނާރެސް - 594،910.84ރ.
• ހަމަ ނިއުސް - 582،117.06ރ.
• މޯލްޑިވްސް ބިޒްނަސް ރިވިއު: 582،117.06ރ.
• އޭދަފުށި ޓައިމްސް - 569،323.27ރ.
• ހުވަދޫ މީޑިއާ - 562،926.38ރ.
• ރާއްޖެ 24 - 550،132.60ރ.
• މާދަމާ ނިއުސް - 530،941.93ރ.

މިއީ މީޑިއާ ގްރާންޓަށް ޝަރުތު ހަމަވާ މީޑިއާތައް އިއުލާންކުރި ދެވަނަ ފަހަރެވެ. ޔޫތު މިނިސްޓްރީން މީގެ ކުރިން މީޑިއާ ގްރާންޓަށް ހުޅުވާލުމުން 18 މީޑިއާއަކަށް 27.9 މިލިއަން ރުފިޔާ ދިނުމަށް ނިންމި އެވެ. ނަމަވެސް އަމާޒުވި ފާޑުކިޔުންތަކާއެކު ކުއްލިއަކަށް އެ ލިސްޓު މިނިސްޓްރީން ބާތިލުކުރި އެވެ.

ފަހުން މިނިސްޓްރީން ކުރި އިއުލާނެއްގައި ބުނީ މީޑިއާތަކަށް ފައިސާ ދޫކުރުމަށް އެންމެ ރަނގަޅީ މޯލްޑިވް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) ކަމަށް ދެކޭތީ އެ ޒިންމާ އެ ކޮމިޝަނާ ހަވާލުކޮށްފައިވާ ކަމަށެވެ.

ކޮންޓްރޯލް ކޮމިޝަނުން މީޑިއާ ގްރާންޓަށް ކުރިމަތިލާން ހަފްތާ ބަންދު ހިމެނޭ ގޮތަށް ދެ ދުވަހުގެ މުއްދަތެއް ދިނުމުން އެކަމާ ގުޅިގެން ބައެއް ފަރާތްތަކުން ކަންބޮޑުވުން ފާޅުކުރި އެވެ.