ތިމާވެށި ހިމާޔަތްކޮށް، ދެމެހެއްޓެނިވި ގޮތެއްގައި ރާއްޖޭގެ ގުދުރަތީ ވެށި އާލާކުރުމަށް މޯލްޑިވްސް އިސްލާމިކް ބޭންކުން ކުރިއަށްގެންދާ "ގްރީން ބްލޫ އިނިޝިއޭޓިވް" ގެ ދަށުން، ލާމު ގަމުގައި 1,000 ގަސް އިންދުމުގެ މަސައްކަތް ރަސްމީކޮށް ފަށައިފި އެވެ.

މި މަޝްރޫއަކީ ލާމު އަތޮޅުގެ ގުދުރަތީ ނިޒާމު ދަމަހައްޓައި، ކުރިއަށް އޮތް ޖީލުތަކަށް ރައްކާތެރި ވެށްޓެއް ކަށަވަރުކޮށްދިނުމުގެ މަގުސަދުގައި މިދިޔަ އަންގާރަ ދުވަހުން ފެށިގެން ކުރިއަށްގެންދާ ހަރަކާތެއް ކަމަށް އެމްއައިބީ އިން ބުނެ އެވެ.

މި އިނިޝިއޭޓިވްގެ ދަށުން އިންދުމަށް ހަމަޖެހިފައިވަނީ ރާއްޖޭގެ މާހައުލާ ގުޅޭ، ހާއްސަކޮށް ލާމު އަތޮޅުގައި ހެދޭ ގަހުގެ ބާވަތްތަކެވެ. އޭގެ ތެރޭގައި މަދޮށި، ކާނި، ކިނބި، ފުނަ، މޫނިމާ، މިދިލި، ހިރުނދު، ބޯކަށިކެޔޮ، ނިކަ، ކަނދު އަދި ދިވެހި ރުއް ހިމެނެއެވެ.

މި މަޝްރޫއު ކާމިޔާބުކަމާއެކު ކުރިއަށް ގެންދިއުމުގައި ގިނަ އަދަދެއްގެ މުއައްސަސާތަކަކުން އެހީތެރިކަން ފޯރުކޮށްދެއެވެ.

އޭގެ ތެރޭގައި އިހައްދޫ ސްކޫލް، ހަމަދު ސްކޫލް، މުކުރިމަގު ސްކޫލް، މޯލްޑިވްސް ހެރިޓޭޖް ސޮސައިޓީ، ގަން ކައުންސިލް، އާރް.ޑީ.ސީ، އެމް.ޓީ.ސީ.ސީ، ގަން އަންހެނުންގެ ތަރައްގީއަށް މަސައްކަތްކުރާ ކޮމިޓީ، ހޮރައިޒަން ފިޝަރީޒް، ވެމްކޯ އަދި މޯލްޑިވްސް ޕޮލިސް ސާވިސް ހިމެނެއެވެ.

މޯލްޑިވްސް އިސްލާމިކް ބޭންކަކީ ދިވެހިރާއްޖޭގައި އިސްލާމީ ޝަރީއާގެ އުސޫލުތަކަށް ތަބާވާ ފުރިހަމަ ބޭންކިން ހިދުމަތް ދިނުމަށް އުފެދުނު ފުރަތަމަ ބޭންކެވެ.