‏ލޭގެ ޕްރެޝަރު (ހައި ބްލަޑް ޕްރެޝާ) މަތިވުމަކީ ދުނިޔޭގައި މިލިއަނުން މީހުން ކުރިމަތިލާ މައްސަލައެކެވެ. އަދި ‏‏މިއީ ހިތުގެ ބަލިތަކާއި ސްޓްރޯކް ޖެހުމުގެ މައިގަނޑު ސަބަބެކެވެ. އާންމު ގޮތެއްގައި ލޭގެ ޕްރެޝަރު ‏‏ކޮންޓްރޯލްކުރުމަށް ލޮނު (ސޯޑިއަމް) މަދުކުރަން ޑޮކްޓަރުން ލަފާދޭއިރު، ޔުނިވާސިޓީ އޮފް ވޯޓާލޫގެ ‏‏ދިރާސާއަކުން ދައްކަނީ ލޮނު މަދުކުރުމަށްވުރެ ޕޮޓޭސިއަމް އިތުރުކުރުމުން ލޭގެ ޕްރެޝަރު ދަށްކުރުމަށް ފައިދާ ‏‏ބޮޑުވެދާނެ ކަމަށެވެ‏‎.‎

‏ޕޮޓޭސިއަމްއަކީ ހަށިގަނޑުގެ ފެން ހިފެހެއްޓުމަށާއި ނާރުތަކުގެ ނިޒާމް ރަނގަޅަށް މަސައްކަތްކުރުމަށް ބޭނުންވާ ‏‏މިނަރަލެކެވެ. މިހާރުގެ ކެއުމުގެ އާދަކާދައިގައި ޕްރޮސެސްކޮށްފައިވާ ކާނާ ގިނަވުމުން ލޮނު އިތުރުވެ، ޕޮޓޭސިއަމް ‏‏މަދުވެ އެވެ. އެހެންނަމަވެސް، މި ދިރާސާއިން ދައްކާ ގޮތުގައި ޕޮޓޭސިއަމް ގިނަ ކާނާ ކެއުމުން ލޮނުގެ ނޭދެވޭ ‏‏އަސަރުތައް ދަށްކޮށް، ލޭގެ ޕްރެޝަރު ކޮންޓްރޯލްކުރުމަށް އެހީތެރިވެދެ އެވެ‏‎.‎

‏ކުރީގެ ޖީލުތަކުގެ މީހުން މޭވާއާއި ތަރުކާރީ ގިނައިން ކައިއުޅެފައިވެ އެވެ. މިއިން ޕޮޓޭސިއަމް ގިނައިން ލިބެ އެވެ. ‏‏ނަމަވެސް މިހާރުގެ ކެއުމުގެ އާދަތަކުގައި ލޮނު ގިނަ މޭޒުމަތީގެ ކާނާ އާންމުވެ، ޕޮޓޭސިއަމް މަދުވެފައިވެ އެވެ. ދިރާސާއިން ‏‏އިތުރަށް ދައްކަނީ މެނޮޕޯޒްއަށް ނުދާ އަންހެނުންގެ ގައިގައި ގުދުރަތީ ގޮތުން ހައި ބްލަޑް ޕްރެޝަރު ޖެހުމުގެ ‏‏ފުރުސަތު ކުޑަކަމާއި، ފިރިހެނުންނަށް މި ރިސްކް ބޮޑު ކަމަށެވެ. އެހެންނަމަވެސް، ފިރިހެނުން ވެސް ޕޮޓޭސިއަމް ‏‏އިތުރުކުރުމަށް އެކަށީގެންވާ ގޮތަކަށް ޖަވާބުދޭކަން ފާހަގަކޮށްފައިވެ އެވެ‏‎.‎

‏ޕޮޓޭސިއަމް ގިނައިން ހުންނަ ކާނާގެ ތެރޭގައި ބްރޮކޮލީ، ފަލަމަޑި، ދޮންކެޔޮ ފަދަ ތަރުކާރީ، މޭވާ އަދި ބައެއް ‏‏މަސްމަހާ މެހި ހިމެނެ އެވެ. މިފަދަ ކާނާ އިތުރުކޮށް، ޕްރޮސެސްކޮށްފައިވާ ކާނާ މަދުކުރުމުން ދުޅަހެޔޮ ޕޮޓޭސިއަމް-‏‏ސޯޑިއަމް ރޭޝިއޯއަކަށް ވާސިލުވެވޭނެ އެވެ‏‎.‎

‏ބޮޑެތި ދިރާސާތަކުން ދައްކާ ގޮތުގައި ޕޮޓޭސިއަމް މަތީ މިންވަރެއްގައި ހިމެނޭ ކާނާ ގިނައިން ކެއުމުން ސްޓްރޯކާއި ‏‏ހިތުގެ ބަލިތައް ޖެހުމުގެ ފުރުސަތު ކުޑަވެ އެވެ. މިކަމުގެ ހޭލުންތެރިކަން އިތުރުވުމުން، ކުޑަ ބަޖެޓެއްގައި ވެސް ކެއުމުގެ ‏‏ވައްޓަފާޅި ބަދަލުކޮށްގެން ލޭގެ ޕްރެޝަރު ކޮންޓްރޯލްކުރެވިދާނެ އެވެ‏‎.‎

‏މި ދިރާސާގެ މައްޗަށް ބިނާކޮށް، ލޭގެ ޕްރެޝަރު ހިފެހެއްޓުމަށް ހަމައެކަނި ލޮނު މަދުކުރުމުގެ ބަދަލުގައި ޕޮޓޭސިއަމް ‏‏ގިނަ ކާނާ އިތުރުކުރުމަށް ސަމާލުކަން ދެވިދާނެ އެވެ. މި ދިރާސާ ޝާއިއުކޮށްފައިވަނީ އެމެރިކަން ޖާނަލް އޮފް ‏‏ފިޒިއޮލޮޖީ-ރީނަލް ފިޒިއޮލޮޖީގަ އެވެ‏‎.‎