ވިލާ ފައުންޑޭޝަންގެ ޗެއާމަން އަދި މާމިގިލި ދާއިރާގެ މެންބަރު ގާސިމް އިބްރާހިމްގެ އެހީތެރިކަމާ އެކު އދ. މާމިގިލީގައި ފުލުހުންގެ މަރުކަޒެއް ބިނާ ކުރުމަށް މިއަދު ބިންގާ އަޅައިފި އެވެ.

މާމިގިލީގައި ބޭއްވި ރަސްމިއްޔާތެއްގައި ފުލުހުންނާއި ވިލާ ފައުންޑޭޝަނާއި ދެމެދު ފުލުހުންގެ މަރުކަޒު އެޅުމުގެ އެއްބަސްވުމުގައި ވަނީ ސޮއިކޮށްފަ އެވެ.

އެ އެއްބަސްވުމުގައި ފުލުހުންގެ ފަރާތުން ސޮއިކުރެއްވީ ކޮމިޝަނާ އޮފް ޕޮލިސް އަލީ ޝުޖާއު އެވެ. އަދި ވިލާ ފައުންޑޭޝަންގެ ފަރާތުން ސޮއިކުރެއްވީ ގާސިމް އެވެ.

މާމިގީލިގައި އަޅާ ފުލުހުންގެ އެ މަރުކަޒުގައި އޮފީސް އިމާރާތަކާއި، ފުލުހުންގެ އެކޮމޮޑޭޝަން އަދި މެސް ރޫމެއް ވެސް ހިމެނެ އެވެ.

އެ މަޝްރޫއު ވިލާ ފައުންޑޭޝަނާއި ހަވާލުކުރީ އެއް އަހަރު ދުވަހުގެ މުއްދަތެއްގައި މަސައްކަތް ނިންމައި ހަވާލުކުރާ ގޮތަށެވެ.