ރުޅިވެރިކަމަކާއި، ހަސަދަވެރި ކަމަކުން ހިތްތައް ސާފުކުރުމަށާއި ބައިބައިނުވެ، އެއްގަލަކަށް އެރުމަށް ފިތުރު އީދު ހުތުބާގައި ގޮވާލައިފި އެވެ.

ރޯދަ މަހަށް ފަހު މިއަދު މުޅި ރާއްޖޭގައި އީދުގެ އުފާ ފާޅުކުރާނެ އެވެ.

މިއަދުގެ އީދު ނަމާދުގެ ޖަމާއަތުން ހާމަކޮށް ދެނީ އެއްބައިވަންތަކަން ކަމަށާއި އަހަރެމެންގެ ކުޑަކުދީންނާއި ބޮޑެތި މީހުންގެ މެދުގައި، ފަގީރުންނާއި މުއްސަނދީންގެ މެދުގައި އޮތް ކުލުނުވެރިކަމާއި ލޯބި ކަމަށް ހުތުބާގައި ފާހަގަކުރި އެވެ.

އެހެންވެ، މި އުފާވެރިކަން ފާހަގަ ކުރާއިރު، ހުރިހާ ރުޅިވެރި ކަމަކާއި، ހަސަދަވެރިކަމަކުން އަހަރެމެންގެ ހިތްތައް ސާފުކޮށް، ބައިބައިނުވެ، އެއްގަލަކަށް އެރުމަށް ގޮވައިލި އެވެ. އަދި އަހުރެމެންގެ ތެރެއިން ކޮންމެ މީހަކު ވެސް އަނެކާގެ ހައްގު އަދާކުރުމަށް، ހާއްސަކޮށް މައިންބަފައިންގެ ހައްގު އަދާ ކުރަން ނަސޭހަތްތެރިވި އެވެ.

"މައިންބަފައިންކުރެ ހަމަ އެކަކު ވެސް ހިތުގައި ނުޖައްސަން މިއަދު އަޒުމު ކަނޑައަޅާށެވެ. މާތް ﷲ ވަހީކުރައްވައިފައިވާ ބަސްފުޅެއްގެ މާނައިގައި ވެއެވެ؛ އެ ކަލާނގެއަށް މެނުވީ، ތިޔަބައިމީހުން އަޅުކަން ނުކުޅައުމަށާއި، މައިންބަފައިންނަށް ހެޔޮކޮށް ހިތުމަށް، ކަލޭގެފާނުގެ ވެރިރަސްކަލާނގެ ކަނޑައަޅުއްވައި އެންގެވިއެވެ. އެ ދެ މީހުންކުރެ އެކަކު، ނުވަތަ އެ ދެމީހުން ތިބާގެގާތުގައި ތިބެ، މުސްކުޅިކަމާ ހަމަޔަށް ފޯރައްޖެނަމަ، އެ ދެ މީހުންނަށް އުއްފު ވެސް ނުބުނާށެވެ،" ހުތުބާގައި ހަނދާންކޮށް ދިނެވެ.

ގައުމުގެ އިސްލާމީ ޝަހުސިއްޔަތަކީ، އިސްލާމް ދީނާއި، އެކުވެރިކަމާއި، މިނިވަންކަމާއި، އިސްތިލާލު ކަމަށް ވާއިރު، ހުތުބާގައި، ކުރިއަށް އޮތް ޖީލުތަކަށް މި މަތިވެރި އަގީދާ ފޯރުކޮށްދީ، ގައުމުގެ އިސްލާމީ ޝަހުސިއްޔަތު ރައްކައުތެރިކޮށް، ދަމަހައްޓާން މިއަދު އަޒުމު ކަނޑައަޅަން ގޮވާލި އެވެ.

"މި ލޮބުވެތި ވަތަން، ސައްތައިން ސައްތަ އިސްލާމީ ގައުމެއްގެ ގޮތުގައި ދެމެހެއްޓޭނީ، އަހަރެމެންގެ ދަރީންނަށް އިސްލާމީ ތަރުބިޔަތާއި ތަޢުލީމު ފޯރުކޮށްދީގެން،" ހުތުބާގައި ނަސޭހަތްތެރިވި އެވެ.

ރަޙިމުގެ ގުޅުން ދެމެހެއްޓުމަކީ މައިންބަފައިންގެ ހައްގުތަކާ ގުޅިފައިވާކަމެއްކަން ފާހަގަކޮށް މި އީދުގައި ގާތްތިމާގެ މީހުންނަށް ޒިޔާރަތްކޮށް ހެޔޮފޯރުކޮށް ދިނުމާއި އީދުގެ ތަހުނިޔާ އާއި ހެޔޮ އެދުންތައް ފޮނުވުމުގެ މުހިއްމުކަން ހަނދާންކޮށް ދިނެވެ.

އީދު ދުވަހު އަހަރެމެންގެ އިންސާނިއްޔަތުކަން ފާޅުވާން ޖެހޭނެ ކަމަށާއި ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މުސްލިމު އަހުންނާއި އުހުތުންގެ މަތީން އަހަރެމެން ހަނދާންކުރާން ޖެހޭނެ ކަމަށް ހުތުބާގައި ގޮވައިލި އެވެ.