ވަގު ފޯމުތަކެއް ފުރައިގެން ހދ. ވައިކަރަދޫގެ ގިނަ ބަޔަކާއެކު އެމްޑީޕީއަށް ނިސްބަތްވާ އެ ދާއިރާގެ މަޖިލިސް މެންބަރު، ހުސެއިން ޒިޔާދު (ފިއްޓޭ) ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވެއްދި މައްސަލާގައި ޒިންމާވާ ފަރާތްތަކާ ދެކޮޅަށް ފިޔަވަަޅު އަޅާނެ ކަމަށް އިލެކްޝަންސް ކޮމިޝަން (އީސީ)އިން ބުނެފި އެވެ.

އެކަން ކަށަވަރު ކޮށްދެއްވައި "އަދަދު" ނޫހަށް މައުލޫމާތު ދެއްވަމުން ފިއްޓޭ ވިދާޅުވީ އޭނާ ޕީއެންސީއަށް ވައްދާފައި އޮތީ މިދިޔަ ޑިސެމްބަރު 23، ގައި ކަމަށެވެ. އެ މައްސަލާގައި މިއަދު އޭނާ ނިސްބަތްވާ އެމްޑީޕީން އީސީއާ ވެސް ބައްދަލުކުރި އެވެ.

ފިއްޓޭގެ މަޖިލިސް ގޮނޑިއާ މެދު ބައެއް ފަރާތްތަކުން ސުވާލު އުފެއްދި ނަމަވެސް އޭނާގެ ސިޔާސީ ޕާޓީގެ މެމްބަޝިޕްގެ ހައިސިއްޔަތަށް އެއްވެސް ބަދަލެއް އައިސްފައިނުވާކާން އީސީން ކަށަވަރު ކޮށްދިނެވެ.

"އެ ބޭފުޅާއަށް އެނގިވަޑައިގަތުމެއް ނެތި، ޕީޕަލްސް ނޭޝަނަލް ކޮންގްރެސް (ޕީއެންސީ)އަށް ރަޖިސްޓަރީ ކުރުމަށް ޓަކައި މި ކޮމިޝަނަށް ފޯމެއް ހުށަހަޅާފައިވާތީވެ، މިކަމުގައި ޒިންމާވާ ފަރާތްތަކުގެ މައްސަލަ އިތުރަށް ބަލައި ފިޔަވަޅުއަޅާނެ ކަމުގައި ދަންނަން،" އީސީން ނެރުނު ބަޔާނެއްގައި ބުނެފައިވެ އެވެ.

އެ ކަމާ ގުޅިގެން އިދާރީ ގޮތުން ފުރިހަމަ ކުރަން ޖެހޭ ކަންކަން ކުރަމުންދާކަން ހާމަކޮށް އީސީން ވަނީ އެފަދަ ކަމެއް އިތުރަށް ތަކުރާރު ނުވާނޭ ފަދައިން އިދާރީ އަދި ގާނޫނީ އިންތިޒާމުތައް ހަމަޖައްސާނެ ކަމުގެ ޔަގީންކަން ދީފަ އެވެ.

ފިއްޓޭ ޕީއެންސީއަށް ވެއްދުން ކުށްވެރިކޮށް، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާގުޅުން ހުރި އިދާރާތަކުން މިއަދު އެމްޑީޕީން ވަނީ ގޮވާލާފަ އެވެ. އެމްޑީޕީގެ ގައުމީ މަޖިލީހުގެ ބައެއް މެމްބަރުންނާއި ބައެއް އާންމު މެމްބަރުން ވެސް ވަނީ މިފަދަ މައްސަލަތަކުގެ ކަންބޮޑުވުން ދާދިފަހުން ހިއްސާކޮށްފަ އެވެ.

ސިޔާސީ ޕާޓީތަކަށް މީހުން ވެއްދުމަށް ވަގު ފޯމު ފުރައި ހުށަހެޅުމުން އެ ފޯމުތައް ޕްރޮސެސްކޮށް ޕާޓީތަކުގެ ދަފްތަރަށް ބޮޑެތި ބަދަލުތަކެއް މިފަހުން ވަނީ އައިސްފަ އެވެ. ސޮއި ފޯޖުކޮށްގެން ޕާޓީތަކަށް ވައްދަމުންދާ ކަމުގެ ޝަކުވާ ބައެއް އާންމު ރައްޔިތުން ވެސް ދަނީ ކުރަމުންނެވެ.