އދ. އަތޮޅު މިރިހި އައިލެންޑް ރިސޯޓް ކައިރީގައި އޮތް “ނޯތު 7” ނަމަކަށް ކިޔާ ސަފާރީއަކުން މޫދަށް ވެއްޓުނު ދިވެއްސަކު ގެއްލިގެން ހޯދަން ފަށައިފި އެވެ.

މީޑިއާތަކަށް ފުލުހުން މިއަދު ފޮނުވި މެސެޖެއްގައި ބުނީ ގެއްލިގެން ހޯދަނީ އަލީ އަރުޝަދު، 35، ސީވީޑް، ނ. ހޮޅުދޫ ކަމަށެވެ. ފުލުހުން ބުނީ އޭނާ ގެއްލިފައިވާ ކަމުގެ ރިޕޯޓު ލިބުނީ މިއަދު ކަމަށެވެ.

ރިޕޯޓު ލިބުމާ ގުޅިގެން ސަފާރީގެ ސީސީޓީވީ ފުޓޭޖު ބެލުމުން ގެއްލިގެން ހޯދާ މީހާ ސަފާރީގެ ޑެކު މަތީގައި ހުއްޓައި ވެއްޓި އަރިމަތީގައި ޖެހިފައި މޫދަށް ވެއްޓިފައިވާ މަންޒަރު ފެނުނު ކަމަށް ފުލުހުން ބުންޏެވެ.

އެމްއެންޑީއެފުން ބުނީ އެ މީހާ ހޯދުމުގެ މަސައްކަތް ފެށުމަށްޓަކައި އެމްއެންޑީއެފްގެ ޑައިވިން ޓީމެއް އެ ސަރަހައްދަށް މިހާރު ދަތުރު ކުރަމުންދާ ކަމަށެވެ.