ގައުމީ ވޮލީބޯޅަ މުބާރާތުގެ ސެމީ ފައިނަލުގައި ސްޕޯޓްސް ކްލަބް ސިޓީ ކަޓުވާލުމަށް ފަހު، ދިވެހި ސިފައިންގެ ކްލަބުން ފައިނަލުގެ ފަހު ޖާގަ ހޯދައިފި އެވެ.

މިރޭ ކުޅޭ ފައިނަލުގައި، އެންމެ ފަހުގެ ޗެމްޕިއަން، ސިފައިން ބައްދަލުކުރާނީ ކްލަބް އެޗްޑީސީއާ އެވެ.

ގައުމީ ވޮލީ ލީގުގެ ގަދަ ހަތަރު ޓީމުގެ މެދުގައި ގައުމީ މުބާރާތް މި ފަހަރު ކުޅޭ ފޯމެޓަށް ބަދަލު އައިސްފައިވާއިރު، ފުރަތަމަ ކުޅެނީ ލީގު ބުރެކެވެ. އެއް ވަނަ އަށް ފައިނަލުގެ ސީދާ ޖާގަ ލިބޭއިރު، ދެ ވަނަ އާއި ތިން ވަނައިގެ މެދުގައި ސެމީ ފައިނަލެއް ކުޅެ، ފައިނަލުގެ ފަހު ޖާގަ ކަނޑައަޅާނެ އެވެ.

ލީގު ބުރުގެ ކުޅުން ނިމުނުއިރު، އެޗްޑީސީ އަށް ވަނީ ތިން މެޗުން ހަތް ޕޮއިންޓު ލިބިފަ އެވެ. އެހެންވެ، އެ ޓީމަށް ފައިނަލުގެ ފުރަތަމަ ޖާގަ ލިބުނީ އެވެ. ލީގު ބުރުގެ ދެ ވަނަ އަށް ދިޔަ ސްޕޯޓްސް ކްލަބް ސިޓީ އަށް ތިން މެޗުން ހަ ޕޮއިންޓް ލިބުނުއިރު، ތިން ވަނައިގައި އޮތް އެންމެ ފަހުގެ ޗެމްޕިއަން ސިފައިންނަށް ވަނީ ފަސް ޕޮއިންޓު ލިބިފަ އެވެ. އެހެންވެ، މި ދެ ޓީމުގެ މެދުގައި، ސެމީ ފައިނަލެއް ކުޅެ ފައިނަލުގެ ފަހު ޖާގަ ކަނޑައެޅީ އެވެ

ފުލަށް ދިޔަ ބްލޫސް ފޯ ވޮލީބޯލް އަށް ޕޮއިންޓެއް ނުލިބި ކެޓީ އެވެ.

ރޭ ކުޅުނު ސެމީ ފައިނަލުން ސިފައިން މޮޅުވީ ސީދާ ތިން ސެޓުންނެވެ. އެ ގޮތުން، ސިފައިން ސެޓުތައް ގެންދިޔައީ، 25-22، 25-22 އަދި 25-15 އިންނެވެ. މެޗުގެ މޮޅު ކުޅުންތެރިއަކީ ސިފައިން ޓީމުގެ ހުސެއިން ރަޒާން އެވެ.

ގައުމީ ފައިނަލުގައި ސިފައިން މިރޭގެ މެޗުގައި، އެޗްޑީސީއާ ކުޅޭއިރު، މި ފަހަރު، އެޗްޑީސީން ވަނީ ސިފައިން ބަލިކޮށް، އެސޯސިއޭޝަން ކަޕާއި ގައުމީ ލީގު ކާމިޔާބުކޮށްފަ އެވެ. އެކަމަކު، ގައުމީ މުބާރާތުގެ ލީގު ބުރުގެ ފަހު މެޗުން ސިފައިން ވަނީ ފަސް ސެޓު ކުޅެގެން، އެޗްޑީސީ ބަލިކޮށްފަ އެވެ.