ފުވައްމުލައް ސިޓީގައި ނެޓްވޯކް ހަދައިގެން މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްވެ ހަރަކާތްތެރިވާ ކަމުގެ ތުހުމަތުގައި ހައްޔަރުކުރި ދެ މީހުންގެ ބަންދު އަމުރު ހައި ކޯޓުން މިއަދު ބާތިލު ކުރުމުން، ސަލާމަތްވެއްޖެ އެވެ.

ފުލުހުންގެ އިންޓެލިޖެންސަށް ލިބުނު މައުލޫމާތުގެ އަލީގައި ފުވައްމުލަކުގައި މަސްތުވާތަކެތީގެ ވިޔަފާރިކުރާ ނެޓްވޯކުގެ ބޮޑުން ކަމަށް ބުނެ ކޯޓު އަމުރެއްގެ ދަށުން ޑިސެމްބަރު 9، ގައި ހައްޔަރުކުރީ ޏ. ފުވައްމުލައް، ދޫނޑިގަން، ކަރަންކާ ވިލާ، އަހްމަދު ނިއުޝާދު، 34 އަދި ޏ. ފުވައްމުލައް، ދޫޑިގަން، ޒަމާނީގެ، ހަސަން އާޒިމް، 29 އެވެ.

ހައި ކޯޓުގައި ކުރިއަށް ދިޔަ އެ ދެ މީހުންގެ އިސްތިއުނާފުގެ އަޑުއެހުމުގައި ނެރެފައިވާ އަމުރުތައް ބާތިލު ކުރަން ނިންމެވީ ހައިކޯޓުގެ ފަނޑިޔާރު މުހައްމަދު ފައިސަލް، ފަނޑިޔާރު ހަސަން ޝަފީއު އަދި ފަނޑިޔާރު ހުސެއިން މަޖީދު ހިމެނިވަޑައިގަންނަވާ ބެންޗުގެ އިއްތިފާގުންނެވެ.

ހައި ކޯޓުން ކުރި ހުކުމުގައި ބުނީ އެ ދެ މީހުން ބަންދު ކުރަން ކޮންމެ ވެސް މިންވަރެއްގެ ހެކި ހުރި ކަމަށް ބަޔާންކޮށް، އެ މީހުން ޝަރީއަތް ނިމެންދެން ބަންދު ކުރަން ދަށު ކޯޓުން އަމުރުކުރީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފަށް ކަމަށެވެ.

ތަހުގީގަށް ހޯދުނު ގޮތުގައި ފާއިތުވި ފަސް އަހަރު ތެރޭގައި ނިއުޝާދުގެ ބޭންކް އެކައުންޓު މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށާއި ހަސަން އާޒިމްގެ ބޭންކް އެކައުންޓު މެދުވެރިކޮށް ފާއިތުވި ދެ އަހަރު ތެރޭގައި ހަތް މިލިއަން ރުފިޔާއަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ފުލުހުން ބުންޏެވެ.

މައްސަލައާ ގުޅިގެން 21 މީހަކާއި ދެ ކުންފުންޏެއްގެ އެކައުންޓު ކޯޓު އަމުރެއްގެ ދަށުން ހިފަހައްޓައި، އެ ފަރާތްތަކުގެ މައްޗަށް ތުހުމަތު ކުރެވޭ މަނީ ލޯންޑަރިންގެ މައްސަލަ ފުލުހުން ދަނީ ތަހުގީގު ކުރަމުންނެވެ.

މަސްތުވާތަކެތީގެ ވިޔަފާރިއާ ދެކޮޅަށް ފުވައްމުލަކުގައި ފުލުހުން ޖެނުއަރީ 14، ގައި ފެށި "އޮޕަރޭޝަން ވެށި ރައްކަލް" ގެ ދަށުން މިހާތަނަށް 4،048 ތަން ބަލައި ފާސްކޮށް، 1،147 މީހުން ހުއްޓުވައި ސުވާލު ކުރުމުގެ އިތުރުން 58 މީހުން ވަނީ ހައްޔަރު ކޮށްފަ އެވެ.

މަސްތުވާތަކެތީގެ މައްސަލައިގައި ހައްޔަރުކުރި 58 މީހުންގެ މައްޗަށް ކުރެވޭ 75 މައްސަލައެއް ތަހުގީގުކޮށް، 65 މައްސަލައެއްގެ ތަހުގީގު ނިންމައި ޕްރޮސެކިއުޓާ ޖެނެރަލްގެ އޮފީހަށް ފުލުހުން ވަނީ ފޮނުވާފަ އެވެ.