ވ. ފުލިދޫ ކައިރީ އޮންނަ ބޯމަސް ކަނޑު ޑައިވް ސައިޓަށް ފީނަން ގޮސް އުޅެނިކޮށް ގެއްލުނު ޗައިނާ ހަތް މީހުން ސަލާމަތް ކޮށްފި އެވެ.

ފުލުހުން ބުނީ އެ ހަތް ޗައިނާ މީހުން ގެއްލުނު މައްސަލަ ރިޕޯޓުކުރީ މިއަދު އިރުއޮއްސި 18:26 ގައި ކަމަށާއި އެ މީހުން ސަލާމަތްކުރީ އެ ސަރަހައްދުގައި ހަރަކާތްތެރިވި ފުލިދޫ ލޯންޗަކުން ކަމަށެވެ.

އެ ޗައިނާ ހަތް މީހުންގެ ވެސް ހާލު ރަނގަޅު ކަމަށް ވެސް ފުލުހުން ބުންޏެވެ. އެކަމާ ގުޅޭ އިތުރު ތަފްސީލެއް ފުލުހުން ދީފައެއް ނުވެ އެވެ.

"އެމީހުން ހޯދުމަށްޓަކައި އެ ސަރަހައްދުގައި އެވަގުތު ހަރަކާތްތެރިވި ވ. ފުލިދޫ ލޯންޗަކުން ކަނޑުމަތިން ހަތް މީހުން ފެނިގެން ސަލާމަތްކޮށްފައިވޭ،" ފުލުހުން ބުންޏެވެ.

ރާއްޖެއަށް ޗުއްޓީ ހޭދަކުރަން އަންނަ ޗައިނާ ފަތުރުވެރިންނަށް ކަނޑުމަތީގައި ހިތާމަވެރި ހާދިސާތައް ހިނގާފައި އެބަހުއްޓެވެ. އެގޮތުން ސްނޯކްލިން އަދި ފީނަން ގޮސް ބައެއް މީހުން މަރުވެފައި ވެސް އެބަ ހުއްޓެވެ.

ރާއްޖެއަށް ޗުއްޓީ ހޭދަ ކުރަން އަންނަ ޗައިނާ ފަތުރުވެރިން މޫދުގެ އެކި ހަރަކާތްތަކުގައި އުޅޭއިރު އަދި ޗުއްޓީ ހޭދަ ކުރުމުގައި ސަމާލުކަން ދޭންވީ ކަންކަމާ ގުޅޭ ގޮތުން ފުލުހުން މިދިޔަ މަހު ހަރަކާތެއް ވެސް ހިންގި އެވެ.