ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުގެ ފުރަތަމަ ޖަލްސާ ފެބްރުއަރީ 6، ގައި ބާއްވަން މަޖިލީހުގެ ރައީސް އަބްދުއްރަހީމް އަބްދުﷲ ނިންމަވައިފި އެވެ.

މަޖިލީހުގެ އިދާރާއިން ބުނީ މި އަހަރުގެ ފުރަތަމަ ދައުރުގެ ފުރަަތަމަ ޖަލްސާ އޮންނާނީ ފެބްރުއަރީ 6، ވާ ބުރާސްފަތި ދުވަހުގެ ހެނދުނު 09:00 ޖަހާއިރު ކަމަށެވެ.

މަޖިލީހުގެ ދައުރު އަހަރެއްގައި ތިން ބަޔަކަށް ބެހޭއިރު، ފުރަތަމަ ދައުރު އޮންނާނީ ފެބްރުއަރީ 1، އިން މެއި 15، ގެ ނިޔަލަށެވެ. ދެވަނަ ދައުރު ޖޫން 1، އިން އޮގަސްޓް 15، ގެ ނިޔަލަށް ބާއްވަން ޖެހޭއިރު، ތިންވަނަ ދައުރު އޮކްޓޯބަރު 1، އިން ނޮވެމްބަރު މަހުގެ ނިޔަލަށް ބާއްވަން ޖެހެ އެވެ.

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ކުރިން، ދައުރުން ބޭރުގައި ޖަލްސާއެއް ބާއްވަން އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އެދުނު ނަމަވެސް، މިހާތަނަށް ޖަލްސާއެއް ބާއްވާފައެއް ނުވެ އެވެ.

އެމްޑީޕީން ދައުރުން ބޭރުގައި ޖަލްސާއެއް ބާއްވަން އެދުނީ މިދިޔަ ޑިސެމްބަރު 12، ގައި ތިން މިނިސްޓްރީއެއް އަނދައި އަޅިއަށްވި އަލިފާނުގެ ހާދިސާއާ ގުޅިގެންނެވެ.

މަޖިލީހުގެ މިދިޔަ އަހަރުގެ ތިންވަނަ ދައުރު ޑިސެމްބަރު 15، އަށް ދަންމާލަން މިދިޔަ ނޮވެމްބަރު 27، ގައި ނިންމި ނަމަވެސް، އޭގެ ކުރިން ޑިސެމްބަރު 12، ގައި މަޖިލިސް ވަނީ ޗުއްޓީއަށް ގޮސްފަ އެވެ.

ޕްރޮސެކިއުޓާ ޖެނެރަލް (ޕީޖީ) ގެ މަގާމަށް ބޭފުޅަކު އައްޔަންކުރަން ރައްޔިތުންގެ މަޖިލީހުގެ ދައުރުން ބޭރުގައި މިދިޔަ އަހަރު ޖަލްސާއެއް ބޭއްވި އެވެ.