ނާޖާއިޒު ގޮތުގައި ފައިސާ ހޯދައި، 400 މިލިއަނެއްހައި ރުފިޔާ އެކައުންޓުތަކުގައި ދައުރުކުރި ކަސްޓަމްސްގެ 20 އޮފިސަރެއްގެ މައްސަލަ ތަހުގީގު ކުރަން ފަށައިފި އެވެ.

"އަދަދު" ނޫހަށް އެނގިފައިވާގޮތުގައި އެ 20 އޮފިސަރުން ފައިސާ ހޯދާފައި ވަނީ ޑިއުޓީ އޮޅުވާލައިގެންނާއި ކަސްޓަމްސްއިން ދޭ އެހެނިހެން ހިދުމަތްތަކުގެ ތެރެއިންނެވެ. އެ މައްސަލަ ފުލުހުންގެ އިތުރުން ރައްޔިތުންގެ މަޖިލީހުން ވެސް ދަނީ ބަލަމުންނެވެ.

ތުހުމަތު ކުރެވޭ 20 އޮފިސަރުންގެ ތެރެއިން ހަތަރު މީހެއްގެ ފޯނުތަކާއި އިލެކްޓްރޯނިކް ވަސީލަތްތައް ފުލުހުން ވަނީ ކޯޓު އަމުރެއްގެ ދަށުން ބަލައި ފާސް ވެސް ކޮށްފަ އެެވެ. ނަމަވެސް އޭގެ ތެރެއިން އެއްވެސް މީހަކު ހައްޔަރު ކުރިކަމެއް ނުވަތަ ނޫން ކަމެއް އަދި ނޭނގެ އެވެ.

އިތުބާރު ހުރި ގޮތަކަށް މި ނޫހަށް މައުލޫމާތު ލިބިފައިވާގޮތުގައި ތުހުމަތު ކުރެވޭ އޮފިސަރުންގެ ތެރެއިން އެކަކު މިހާރު ހުރީ ރިޓަޔާ ވެސް ކޮށްފަ އެވެ. އެއީ ކަސްޓަމްސްގެ ސީނިއާ އޮފިސަރެއް ކަމަށް ވެސް މައުލޫމާތު ލިބިފައިވެ އެވެ. އަދި ތުހުމަތު ކުރެވޭ އިތުރު އޮފިސަރުން މިހާރު ރިޓަޔާ ކުރުމުގެ މަރުހަލާގައި ތިބި ކަމަށް ވެސް މި ނޫހަށް އެނގިފައި ވެ އެވެ.

ކަސްޓަމްސް އޮފިސަރުންތަކެއްގެ ހިޔާނާތުގެ މައްސަލައެއް ފެންމަތިވެފައިވާއިރު، ކަސްޓަމްސްގެ އޮފިސަރުންގެ ބައިވެރިވުމާއެކު ގަވާއިދާ ހިލާފަށް ރާއްޖެއަށް ބައެއް ތަކެތި އެތެރެކޮށް ހަދާ ކަމުގެ ތުހުމަތު އަބަދުވެސް އޮވެ އެވެ. އެފަދަ ބައެއް މައްސަލަތައް ފެންމަތިވެ، ކަސްޓަމްސްގެ އޮފިސަރުންނާ މެދު މީގެ ކުރިން ފިޔަވަޅު އަޅާފައި ވެސްވެ އެެވެ.

އެގޮތުން މިދިޔަ އޮކްޓޫބަރު މަސް ތެރޭ ގަވާއިދާ ހިލާފަށް ރާއްޖެއަށް މުދާ އެތެރެކުރި މައްސަލައެއް ވެސް ވަނީ ފެންމަތިވެފަ އެވެ.