ރައްޔިތުންގެ މަޖިލީހުގެ ޕީއެންސީއަށް ނިސްބަތްވާ ބައެެއް މެންބަރުންނާއި މި ސަރުކާރުގެ ބައެއް ވެރިންނަށް ހުޅުމާލޭން ބިމުގެ މާކެޓު ރޭޓަށް ވުރެ މާ ބޮޑަށް ވެސް އަގުހެޔޮކޮށް ބިންތަކެއް ވިއްކައިފި އެވެ.

އިއުލާނު ކުރުމެއް ނެތި ވިއްކާލި މި ބިންތަކުގެ މައްސަލަ ފެންމަތިވީ ބިންވެރިޔާ ސްކީމުގެ ނަމުގައި ވަގަށް ގޯތިތަކެއް ވިއްކި މައްސަލަ ފަޅާ އަރާފައި ވަނިކޮށެވެ.

ސަރުކާރުގެ ވެރިންނަށް ހުޅުމާލޭ ފޭސް 2 ގެ ބީޗް ފްރޮންޓުން ބިންތަކެއް ވިއްކާފައި ވަނީ އަކަފޫޓެއް 3000ރ. ރޭޓުން ކަމަށް، މި ނޫހަށް މައުލޫމާތު ދިން، އިތުބާރު ކުރެވޭ އޮފިޝަލަކު ބުންޏެވެ. ހުޅުމާލޭ ބީޗް ފްރޮންޓުން އަކަފޫޓެއް 9000ރ. ރޭޓުން ގަތުމަށް ކުރިން ހުށަހަޅާފައިވެ އެވެ.

ބައެއް މަސްދަރުތަކުން ބުނީ މި ބިންތައް ވިއްކާފައި ވަނީ ބަހާލައިގެން ފައިސާ ދެއްކޭ ގޮތަށެވެ. މި އުސޫލުން ކުރިން ވެސް ބިންތަކެއް ވިއްކި އެވެ.

ނަމަވެސް މިއީ ކުރިން އެޗްޑީސީން އަމަލުކޮށްފައި އޮތް ގޮތެއް ނޫނެވެ.

ހާއްސަ ރޭޓެއްގައި 10 ވަރަކަށް ބިން ވިއްކާފައިވާ ކަމަށް މި ނޫހަށް މައުލޫމާތު ދިން ފަރާތުން ބުންޏެވެ.

އެޗްޑީސީގެ މީޑިއާ އޮފިޝަލް ފޯނަށް ޖަވާބު ނުދެއްވާތީ މިކަމާ ގުޅޭ ގޮތުން އެ ކުންފުނީގެ ބަހެއް ނުލިބުނެވެ.

ބިންވެރިޔާ ސްކީމުން ދޫކުރި ގޯތިތައް ގޮތުގައި ހަދައި، ވިއްކި ގޯތިތަކުގެ މައްސަލައ އިއްޔެ ފަޅައިއެރުމުން، ފުލުހުންނާއި އޭސީސީން ވަނީ މައްސަލައިގެ ތަހުގީގު ފަށައިފަ އެވެ. އަދި އެޗްޑީސީގެ ޗެއާމަން ފިޔަވައި ބޯޑުގެ އެންމެން އަދި ކުންފުނީގެ ބައެއް އިސްވެރިން ވަނީ ސަސްޕެންޑުކޮށްފަ އެވެ.