ޖިއްދާ، ސައުދީ އަަރަބިއްޔާ (ޖެނުއަރީ 9) - ކޯޓު މެދުވެރިކޮށް ބާސެލޯނާގެ ޑެނީ އޮލްމޯ އާއި ޕައު ވިކްޓޯ އަށް މެޗުތަކުގައި ކުޅުމުގެ ވަގުތީ ހުއްދައެއް ލިބުނުތާ އިރުކޮޅެއް ފަހުން، ސްޕެނިޝް ސުޕަ ކަޕްގައި އެތުލެޓިކް ބިލްބާއޯ 2-0 އިން ބަލިކޮށް ބާސެލޯނާ ފައިނަލުން ޖާގަ ހޯދައިފި އެވެ.

ބާސެލޯނާގެ މާލީ މައްސަލަތަކުގެ ސަބަބުން، އެ ޓީމުން މި ސީޒަނުގައި ގެނައި، ޑެނީ އޮލްމޯ އާއި ޕައު ވިކްޓޯގެ ރެޖިސްޓްރޭޝަން ކެންސަލްކޮށްލި މައްސަލައިގައި، ބާސެލޯނާ އިން ވަނީ ކޯޓު މެދުވެރިކޮށް ވަގުތީ ހައްލެއް ހޯދައިފަ އެވެ. އެއީ، މި އެޕީލް މަރުހަލާ ނިމެންދެން އޮލްމޯ އާއި ޕައު ވިކްޓޯ އަށް ކުޅެވޭ ގޮތަށެވެ.

އެހެން ކަމުން، ސުޕަ ކަޕް ފައިނަލުގައި އޮލްމޯ އާއި ޕައު ވިކްޓޯ އަށް ކުޅެވޭނެ އެވެ.

ޖިއްދާގެ ކިންގްސް އަބްދުﷲ ސްޕޯޓްސް ސިޓީގައި ކުޅުނު މެޗުގައި ބާސެލޯނާ އަށް ލީޑުނަގައިިދިނީ 17 ވަނަ މިިނިޓްގައި ގަވީ ޖެހި ގޯލުންނެވެ. އަދި ދެ ވަނަ ހާފު ފަށައިގެން ހަތް މިނިޓް ތެރޭ ބާސެލޯނާގެ އަނެއް ލަނޑު ޖެހީ، ލަމީން ޔަމާލް އެވެ.

އާދިއްތަ ދުވަހު ކުޅޭ ފައިނަލުގައި ބާސެލޯނާ އިން ކުޅެން ޖެހޭ ޓީމެއް އެނގޭނީ މިރޭ ކުޅޭ ސެމީ ފައިނަލުގެ ދެ ވަނަ މެޗަށް ފަހު އެވެ. އެ މެޗުގައި މަޔޯކާ އިން ކުޅޭނީ ރެއާލް މެޑްރިޑާ ދެކޮޅަށެވެ.

މިދިޔަ އަހަރުގެ ފައިނަލުގައި ބާސެލޯނާ އަތުން ރެއާލް ވަނީ 4-1 އިން މޮޅުވެފަ އެވެ. މި މުބާރާތް އެންމެ ގިނަ ފަހަރު ކާމިޔާބުކުރީ، 14 ފަަހަރު ހޯދި ބާސެލޯނާ އެވެ. ރެއާލުން ވަނީ 13 ފަހަރު ތަށި އުފުލާލައިފަ އެވެ.