ސަރުކާރުގެ މިނިސްޓަރުންނާއި އެކި ފަންތީގެ ބޭފުޅުންނާއެކު ރާއްޖޭގެ ރަށްރަށަށް މިހާރު ކުރައްވަމުން ގެންދަވާ ދަތުރަކީ މި އަހަރު ތެރޭގައި ފަށާނެ މަޝްރޫއުތަކާއި ނިމޭނެ މަޝްރޫއުތަކުގެ ވާހަކަ ރައްޔިތުންނަށް ކިޔައިދޭން ކުރައްވާ ދަތުރެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރާއްޖޭގެ ދެކުނުގެ އަތޮޅުތަކަށް ކުރައްވަމުން ގެންދަވާ ދަތުރުގައި މިއަދު ގއ. ކަނޑުހުޅުދޫ ރައްޔިތުންނާ ބައްދަލު ކުރައްވައި ވާހަކަ ދައްކަވަމުން ރައީސް ވިދާޅުވީ ރަށްރަށަށް މިހާރު ކުރައްވަމުން ގެންދަވާ ދަތުރަކީ ރައްޔިތުންނަށް މުހިންމުވާ ކަންކަމުގެ ތެރެއިން މި އަހަރު ކުރެވޭނެ ކަންކަމުގެ ވާހަކަ ކިޔައިދިނުމަށް ކުރައްވާ ދަތުރުތަކެއް ކަމަށެވެ.

"އަޅުގަނޑު މި ދަތުރުތައް މި ކުރަނީ މި ކަންކަން ކޮށްދޭނެ ވާހަކަ ރައްޔިތުންނަށް މުހިންމުވެފައިވާ ކަންކަން ވަރަށް އިސްކަން ދީގެން މި އަހަރު ތެރޭގައި ހިނގައިގަންނާނެ ވާހަކަ އަދި ނިމެމުން ދާނެ ވާހަކަ ދަންނަވަން ވެގެން، އަދި ތި ބޭފުޅުން ވިދާޅުވާން ހުރި ވާހަކަތައް ވެސް އަޅުގަނޑު ގާތުގައި ތަންކޮޅެއް ގާތުން މިހެން ބައްދަލުވެލައިގެން ދައްކައިލުމުގެ ފުރުސަތު ދިނުމަށްޓަކައި އަދި އަޑުއަހަން ވެސް އަޅުގަނޑު ބޭނުންވާތީ،" ރައީސް ވިދާޅުވި އެވެ.

އެމަނިކުފާނު ވަނީ ކަނޑުހުޅުދޫއަށް ވަޑައިގެން އެރަށް ވަރަށް ބައިވަރު ވައުދުތަކެއް ވެވަޑައިގެންފަ އެވެ. އެގޮތުން އެ ރަށުގެ ބަނދަރުގެ މަސައްކަތް މިއަހަރު ފަށައި ނިންމައިދެއްވާނެ ކަމަށާއި އެ ރަށު ސިއްހީ މަރުކަޒުގައި 24 ގަޑިއިރު، ހިދުމަތް ދޭން ފެށޭވަރު ވެސް މި އަހަރު ކޮށްދެއްވާނެ ކަމަށް ވެސް ރައީސް ވިދާޅުވި އެވެ.

އޭގެއިތުރުން އެ ރަށުގެ ފުޓްސަލް ދަނޑުގައި ފެންސު ޖެހުމާއި ރޮސްޓްރަމްއެއް ތަރައްގީ ކުރުމާއި ފުޓުބޯޅަ ދަނޑުގައި ޓާފް އަޅައި އެތުލެޓިކްސްއަށް ވެސް ބޭނުން ކުރެވޭ ފެންވަަރަށް ދަނޑު މި އަހަރު ތަރައްގީ ކޮށްދެއްވާނެ ކަމަށް ރައީސް ވައުދުވެވަޑައިގެންނެވި އެވެ.

ކަނޑުހުޅުދޫގެ ސްކޫލަށް ވާރޭވެހޭ މައްސަލައަށް ހައްލު ހޯދައި ދިނުމަށް އެދި މިދިޔަ އަހަރު އެޑިއުކޭޝަން މިނިސްޓްރީގައި އެދުނު ނަމަވެސް އެކަމުގައި ކުރިއެރުމެއް ލިބިފައި ނުވާތީ އެރަށު ކައުންސިލުގެ ސެކްރެޓަރީ ޖެނެރަލް، އަސްފާހު ހަސަން ވަނީ މިއަދުގެ ރަސްމިއްޔާތުގައި ރައީސްއަށް ޝަކުވާ ދަންނަވައިފަ އެވެ.

އެ ވާހަކަތަކަށް ޖަވާބު ދެއްވަމުން ރައީސް ވިދާޅުވީ ސްކޫލްގެ މަސައްކަތް ނުހިނގާ ލަސްވެފައިވާ މައްސަލަ ހައްލުކޮށް މިހާރު ހިނގަމުންދާ މަސައްކަތުގެ އިތުރުން ވެސް ކްލާސް ރޫމްތަކެއް އެ ކަނޑުހުޅުދޫ ސްކޫލުގައި އަޅައިދެއްވާނެ ކަމަށެވެ.

"ސްކޫލަށް މަލްޓިޕާޕަސް ހޯލާއި އަދި އަޅަމުންދާ ކްލާސް ރޫމުތަކުގެ އިތުރަށް ވެސް އަޅުގަނޑު ގަބޫލު ކުރަނީ މި ރަށުގައި މި ސްކޫލްގައި އަދި އިތުރު ކްލާސް ރޫމްތައް އެޅުމަކީ ހަމަ ކުރަންޖެހޭ ކަމެކޭ، އެހެންވީމާ މިހާރު މަސައްކަތް ކުރެވެމުންދާ މަޝްރޫއުގެ ސްކޯޕުގެ އިތުރަށް ވެސް ކްލާސް ރޫމްތައް ހިމަނައިގެން މި ރަށުގެ ކްލާސް ރޫމާއި އަދި މަލްޓި ޕާޕަސް ހޯލު ނިންމައިދޭނެ ވާހަކަ، މި ސްކޫލުގެ ނިންމައިދޭނެ ވާހަކަ އަޅުގަނޑު ދަންނަވަން،" ރައީސް ވިދާޅުވި އެވެ.