ލަންޑަން (ޖެނުއަރީ 8) - އިނގިރޭސި ފުޓްބޯޅައިގައި މި ސީޒަނުގައި އެންމެ ފޯމުގައި ހުރި ލިވަޕޫލްގެ މުހައްމަދު ސަލާހު، މި ވަގުތު ޓޮޓެންހަމް ހޮޓްސްޕާސްގައި ހުރި ނަމަވެސް ކުރެވޭނެ މާ ބޮޑު ކަމެއް ނެތް ކަމަށް ޓޮޓެންހަމްގެ ކޯޗު އަންޖް ޕޮސްޓެކޮގްލޫ ބުނެފި އެވެ.

އޭނާ އެ ގޮތަށް ބުނެފައިވަނީ، އިނގިރޭސި ލީގު ކަޕްގެ ސެމީ ފައިނަލު ފުރަތަަމަ ލެގުގައި މިރޭ ޓޮޓެންހަމް އިން އަމިއްލަ ދަނޑުގައި ލިވަޕޫލާ ދެކޮޅަށް ކުޅުނު މެޗުގެ ކުރިން ބޭއްވި ނޫސްވެރިންގެ ބައްދަލުވުމުގަ އެވެ.

ޕްރިމިއާ ލީގުގައި ޓޮޓެންހަމް ދަނޑުގައި ލިވަޕޫލުން ވަނީ 6-3 އިން މޮޅުވެފަ އެވެ. އެ މެޗުގައި ސަލާހު ދެ ގޯލު ޖެހި އެވެ. މި ސީޒަނުގައި 27 މެޗު ކުޅުނު ސަލާހު ވަނީ 21 ގޯލު ޖަހައިފަ އެވެ. ޕޮސްޓެކޮގްލޫ ބުނީ އެ ލެވަލްގައި ހުރި ކުޅުންތެރިއަކަށް ވެސް މި ވަގުތު ޓޮޓެންހަމްގައި އުނދަގޫވާނެ ކަމަށެވެ.

"މޯ (ސަލާހު) އަކީ ދުނިޔޭގެ ފެންވަރުގެ މޮޅު ކުޅުންތެރިއެއް. އެކަމަކު، މި ވަގުތު އޭނަ އަހަރެމެން ޓީމަށް ލައިފިއްޔާ އަހަންނަށް ހިއެއްނުވޭ އޭނަ އެ ދައްކަމުން އަންނަ ލެވަލްގެ ކުޅުމެއް ދެއްކޭނެ ހެން. އެއީ މި ވަގުތު ޓީމެއްގެ ގޮތުގައި އަހަރެމެން އޮތް ހިސާބުގެ ގޮތުން،" ޕޮސްޓެކޮގްލޫ ބުންޏެވެ.

"އަހަރެމެންގެ އެޓޭކް ރަނގަޅު، އެކަމަކު، ޓީމެއްގެ ގޮތުގައި ޖުމްލަ މަސައްކަތް ރަނގަޅަށް ނުދަނީ ގިނަ މައްސަލަތަކެއް ހުރުުމުން، އަނިޔާގެ ކަންކަން އެއީ މީގެ އެއް މައްސަލަ،"

ޓޮޓެންހަމްގެ ތަރި، ސޮން ހެއުން މިން ވަނީ އެ ކްލަބާ އެކު ހަދާފައިވާ ކޮންޓްރެކްޓް އަންނަ އަހަރުގެ ޖޫންގެ ނިޔަލަށް އާ ކޮށްފަ އެވެ. ސޮން ވަނީ ޓޮޓެންހަމް އަށް ކުޅެދިން 431 މެޗުން 169 ގޯލު ޖަހައިފަ އެވެ. އޭގެ ތެރޭގައި މި ސީޒަނުގައި ޖެހި ހަތް ގޯލު ވެސް ހިމެނެ އެވެ.

ޕޮސްޓެކޮގްލޫ ބުނީ ސަލާހާއި ސޮންގެ އަޅާކިޔުމަަކީ އޭނާ އަށް ޝައުގުވެރިކަމެއް ނޫން ކަމަށެވެ. އަދި މި ވަގުތު ސަލާހު ކުޅެމުން އަންނަނީ ވާދަކުރާ ކޮންމެ މުބާރާތެއްގައި، "އުދުހެމުން" އަންނަ ޓީމެއްގައި ކަމަށެވެ.