ދިވެހި ޔޫތު ލީގު ބްރޭކަށް ފަހު 16 އަހަރުން ދަށުގެ މެޗުތަކުން ފެށިއިރު، ކްލަބް ވެލެންސިއާ އިން 3-0 އިން ޓީސީ ސްޕޯޓްސް ކްލަބް ބަލިކުރިއިރު، ކްލަބް އީގަލްސް އާއި ހުރިއްޔާ ސްޕޯޓްސް ކްލަބް (ހުރާ) 2-2 އިން އެއްވަރުކޮށްފި އެވެ.

ސޯޅަ އަހަރުން ދަށުގެ ލީގުގެ އެއް ވަނައިގައި އޮތީ ތިން މެޗުން މޮޅުވެ، ނުވަ ޕޮއިންޓް ހޯދާފައިވާ ވެލެންސިއާ އެވެ. ދެ ވަނައިގައި އޮތީ ދެ މެޗުން ހަ ޕޮއިންޓް ހޯދި ސުޕަ ޔުނައިޓެޑް ސްޕޯޓްސް (ސަސް) އެވެ. ތިން ވަނައިގައި އޮތް ޓީސީ އާއި ހަތަރެއްގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ވަނީ ހަ ޕޮއިންޓް ލިބިފަ އެވެ. ޓީސީން ތިން މެޗު ކުޅުނުއިރު، މާޒިޔާ އިން ކުޅުނީ ދެ މެޗެވެ.

އީގަލްސް އާއި ހުރާ ބައްދަލުކުރި މެޗުގެ ތެރެއިން.--- ފޮޓޯ: މުހައްމަދު އަހުނަފް/ އަދަދު ސްޕޯޓްސް

ލީގުގެ ފަސް ވަނައިގައި އޮތް، އީގަލްސް އާއި ހަ ވަނައިގައި އޮތް ހުރާ އަށް ތިން މެޗުން ޕޮއިންޓެއް ލިބިފައިވާއިރު، ހަތް ވަަނައިގައި އޮތް ވިކްޓަރީ އާއި ފުލުގައި އޮތް ޔުނައިޓެޑް ވިކްޓަރީ އަށް ދެ މެޗުން ޕޮއިންޓެއް ނުލިބެ އެވެ.

ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި ވެލެންސިއާގެ ލަނޑުތައް ޖެހީ، އީތަން އިބްރާހިމް ޒަކީ، އައިދު މުހައްމަދު ޖަވީޒް އަދި އަލީ އިލާން އަހުމަދު އެވެ.

ރޭ ކުޅުނު މެޗުގައި އީގަލްސްގެ ލަނޑުތައް ޖެހީ، އިސްމާއިލް ނާޒިލް ނަޒީފް އާއި މުހައްމަދު ޔޫހާން ފާއިޒް އެވެ. ހުރާގެ ގޯލުތައް ޖެހީ މުހައްމަދު އިޔާން އަހުމަދު އާއި މުހައްމަދު ސަމްއާން ޝައްމޫން އެވެ.

ދިވެހި ޔޫތު ލީގުގައި މިއަދު ހަވީރު ކުޅޭނީ، 16 އަހަރުން ދަށުގައި، މާޒިޔާ އާއި ސަސް އެވެ. އަދި މިރޭ ކުޅޭނީ ޔުނައިޓެޑް ވިކްޓަރީ އާއި ވިކްޓަރީ އެވެ.