ގައުމީ ސިއްހީ އިންޝުއަރެންސް ސްކީމް، އާސަންދައިގެ ދަށުން ބޭސް ނަގާއިރު، އަމިއްލަ އަތުން ފައިސާ ދައްކަން ޖެހިއްޖެ ނަމަ ނުވަތަ އެ ސްކީމުގެ ދަށުން ލިބެންޖެހޭ ބޭހެއް ނުލިބިއްޖެ ނަމަ ރިޕޯޓު ކުރަން އާސަންދަ ކުންފުނިން އެދިއްޖެ އެވެ.

ސޯޝަލް މީޑިއާގައި އާސަންދައިން ކުރި ޕޯސްޓެއްގައި ބުނީ އާސަންދައިގެ ދަށުން ހިލޭ ބޭސް ނުލިބޭ ނަމަ ނުވަތަ ލިބެންޖެހޭ ބޭހެއް ނުލިބިއްޖެ ނަމަ އާސަންދައިގެ ޝިކާވަތި ހޮޓްލައިނަށް 7951400 އިން ވައިބާ މެދުވެރިކޮށް ރިޕޯޓު ކުރުމަށް އެދޭ ކަމަށެވެ.

އެގޮތަށް ރިޕޯޓު ކުރާއިރު، ބޭސް ނުލިބުނު ބޭސް ފިހާރައިގެ ނަމާއެކު ބޭސް ސިޓީ އާއި ފައިސާ ދައްކަން ޖެހުނު ނަމަ، ފައިސާ ދެއްކި ރަސީދު ވެސް ވައިބާ ކުރަން އާސަންދައިން އެދިފައިވެ އެވެ.

އާސަންދައިގެ ދަށުން ދޫކުރާ ބޭސްތަކަށް މިދިޔަ އަހަރު ބަދަލު ގެނައުމާއެކު ބައެއް ފާމަސީތަކުން އާސަންދައިގެ ދަށުން ބޭސް ނުލިބޭ ކަމުގެ ޝަކުވާ ވަނީ ބޮޑުވެފަ އެވެ.

އާސަންދައިގެ ދަށުން ދޫކުރާ 250 ބޭހެއްގެ އަގަށް ބަދަލު ގެންނަން ސަރުކާރުން ނިންމީ އާސަންދައަށް ސަރުކާރުން ކުރާ ހަރަދު ކުޑަކޮށް އެ ނިޒާމު ހަރުދަނާ ކުރަން ކުރާ ރީފޯމު މަސައްކަތުގެ ތެރެއިންނެވެ.

އެގޮތުން ބަދަލު ގެނައީ އާސަންދައިގެ ދަށުން އެންމެ ގިނައިން ދޫކުރާ ބޭސްތަކުގެ އަގުތަކަށެވެ. އެ ބަދަލާއެކު ބޭސްތަކުގެ އަގު ހެޔޮވެ، އާސަންދައަށް ދައުލަތުން ކުރާ ހަރަދުގެ ތެރެއިން އަހަރެއްގެ މައްޗަށް 220 މިލިއަން ރުފިޔާ ސަލާމަތް ކުރެވޭނެ ކަމަށް އެންސްޕާއިން މީގެ ކުރިން ލަފާ ކޮށްފައިވެ އެވެ.