ރާއްޖޭގައި 2022 އަދި 2023 ގައި ވެސް ކުރި ކަށީގެ ސާޖަރީތަކުގެ އަދަދު ވަރަށް ގިނަ ކަމަށް ހެލްތު މިނިސްޓްރީގެ ތަފާސްހިސާބުތަކުން ދައްކައިފި އެވެ.

ހެލްތު މިނިސްޓްރީން އިއްޔެ އާންމުކުރި ތަފާސްހިސާބުން ދައްކާ ގޮތުގައި 2022 ވަނަ އަހަރު ރާއްޖޭގެ އެކި ކަންކޮޅުގައި، މާލެ ހިމެނޭހެން މުޅި ޖުމުލަ 19,732 ސާޖަރީ ހެދިއިރު ހަމައެކަނި ކަށީގެ 2,875 ސާޖަރީ ހެދި އެވެ. އޭގެތެރެއިން 1,677 މީހުންނަކީ ފިރިހެނުންނެވެ.

2023 ވަނަ އަހަރު ރާއްޖޭގެ އެކި ކަންކޮޅުގައި މާލެ ހިމެނޭހެން މުޅި ޖުމުލަ 20,593 ސާޖަރީ ހެދިއިރު ހަމައެކަނި ކަށީގެ 3,312 ސާޖަރީ ހެދި އެވެ. އޭގެތެރެއިން 1,902 މީހުންނަކީ ފިރިހެނުންނެވެ.

އެހެންކަމުން އެ ދެ އަހަރު ވެސް ރާއްޖޭގައި އެންމެ ގިނަ ފިރިހެނުން ހަދާފައި ވަނީ ކަށީގެ ސާޖަރީ އެވެ.

ހެލްތު މިނިސްޓްރީގެ ތަފާސްހިސާބުތަކުން އެނގޭ ގޮތުގައި ރާއްޖޭގައި އެންމެ ގިނައިން އެ ދެއަހަރު ކުރީ ޖެނެރަލް ސާޖަރީ އެވެ. ދެން އެންމެ ގިނައީ ސިޒޭރިއަން އާއި އަންހެނުންގެ ހާއްސަ އޮޕަރޭޝަންތަކެވެ.

ހެލްތު މިނިސްޓްރީގެ ހިސާބުތަކުން ދައްކާ ގޮތުގައި 2022 ވަނަ އަހަރު ރާއްޖޭގެ އެކި ކަންކޮޅުގައި ސިޒޭރިއަން ހިމެނޭހެން އަންހެނުންގެ ހާއްސަ 4128 ސާޖަރީ އަދި 2023 ވަނަ އަހަރު 4328 ސާޖަރީ ހެދި އެވެ. މި އަދަދުތަކަށް ބަލާއިރު، ރާއްޖޭގައި ސިޒޭރިއަން ހަދާ އަންހެނުންގެ އަދަދު އަންނަނީ އިތުރުވަމުންކަން އެނގެ އެވެ.

2021 ވަނަ އަހަރުގެ ތަފާސްހިސާބުތައް ދިރާސާ ކުރުމަށްފަހު މިދިޔަ އަހަރު ޔޫއެންއެފްޕީއޭއިން ބުނެފައި ވަނީ ރާއްޖޭގެ ކޮންމެ ފަސް އަންހެނަކުން ދެ މީހުން ސިޒޭރިއަން ހަދާ ކަމަށާއި ސިޒޭރިއަން ހަދާ މީހުން ނިސްބަތް ރާއްޖޭގައި ހުރީ 40 އިންސައްތައަށް ވުރެ މަތީގަ ކަމަށެވެ. އެއީ ބައިނަލްއަގުވާމީ މުޖުތަމައުގައި ބަލައިގަންނަ 10 އިންސައްތަ އާއި 15 އިންސައްތައަށް ވުރެ މާބޮޑަށް ވެސް މަތީ އަދަދެއް ކަމަށް އެ އެޖެންސީން ބުނެފައިވެ އެވެ.

ރާއްޖޭގައި ސިޒޭރިއަން ހަދާ މީހުންގެ އަދަދު މަދު ކުރުމަށް މަސައްކަތްތަކެއް ކުރަންޖެހޭ ކަމަށް ޔޫއެންއެފްޕީއޭއިން ގޮވާލައިފައިވެ އެވެ.