އާސަންދަ ސްކީމްގެ ދަށުން ޔުނައިޓެޑް އަރަބް އެމިރެޓްސް (ޔޫއޭއީ) އަދި ތައިލެންޑަށް ބަލި މީހުން ފޮނުވަން ތިން ހޮސްޕިޓަލަކާ އެކު އާސަންދައިން މިއަދު އެއްބަސްވުމެއްގައި ސޮއިކޮށްފި އެވެ.

އާސަންދައިން ބުނީ އާސަންދަ ސްކީމްގެ ދަށުން ބޭސްފަރުވާ ހޯދަން ސޮއިކުރީ ތައިލެންޑްގެ ބެންކޮކް ހޮސްޕިޓަލާއި ދަ ވޯލްޑް މެޑިކަލް ހޮސްޕިޓަލް އަދި ދުބާއީގެ ބުރިޖީލް މެޑިކަލް ސިޓީއާ އެކު ކަމަށެވެ.

އެ ތިން ހޮސްޕިޓަލާ އެކު ސޮއި ކުރުމުން އަންނަ އަހަރު ޖެނުއަރީ 15، އިން ފެށިގެން ކަނޑައެޅޭ އުސޫލެއްގެ ތެރެއިން އެ ހޮސްޕިޓަލްތަކަށް ފަރުވާއަށް ފޮނުވަން ފަށާނެ ކަމަށް އާސަންދައިން ބުންޏެވެ.

އާސަންދައިން ބޭސްފަރުވާއަށް ބަލި މީހުން ޔޫއޭއީއަށް ފޮނުވަން ސޮއިކުރުން -- ފޮޓޯ: އާސަންދަ

އާސަންދަ ސްކީމްގެ ދަށުން ބޭސްފަރުވާއަށް އިންޑިއާ އާއި ސްރީލަންކާގެ އިތުރުން ތައިލެންޑް އަދި ޔޫއޭއީއަށް ދެވޭނެ އިންތިޒާމު ހަމަޖައްސައިދެއްވާނެ ކަމަށް ރައީސް ޑރ. މުހައްމަދު މުއިއްޒު ކުރިން ވިދާޅުވި އެވެ.

ސަރުކާރުން އަންނަނީ އާސަންދަ ރިފޯމް ކުރުމަށް ފިޔަވަޅުތަކެއް އަޅަމުންނެވެ. އެގޮތުން އިންޝުއަރެންސް އޮންނަ ފަރާތްތަކަށް އައުޓް ޕޭޝަންޓްގެ ހިދުމަތް ހޯދާނަމަ އާސަންދަ ނުލިބޭ ގޮތަށް ނޮވެމްބަރު 1، އިން ފެށިގެން ވަނީ ހަމަޖައްސާފަ އެވެ.