މެޑްރިޑް (ޖެނުއަރީ 5) - ސްޕެއިނުގެ ހަތަރު ވަނަ ޑިވިޝަނުގެ ބާބަސްޓްރޯ އަތުން 4-0 އިން މޮޅުވެ، ބާސެލޯނާ އިން ސްޕެނިޝް ކޮޕަ ޑެލް ރޭގެ ގަދަ 16 ބުރުން ފުރުސަތު ހޯދައިފި އެވެ.

އާ އަހަރަށް ސްޕެނިޝް ލީގު މެދުކަނޑާލިއިރު، އެންމެ ފަހުން ކުޅުނު މެޗުތަކުގައި ނަތީޖާ ދަށްވުމުން ބާސެލޯނާގެ ކޯޗު ހަންސީ ފްލިކް ވަނީ ދަށް ޑިިިވިޝަނުގެ ޓީމަކާ ކުޅެން ޖެހުނު ކަމުގައި ވިޔަސް ނިސްބަތުން ވަރުގަދަ ފުރަތަަމަ އެގާރައެއް މި މެޗަށް ނެރެފަ އެވެ.

ބާސެލޯނާ އަށް 21 ވަނަ މިނިޓްގައި ލީޑުނަގައިދިނީ މި ފަހަރުގެ ޓްރާންސްފާ މާކެޓްގައި އެ ޓީމު ދޫކޮށްލާނެ ކަމަށް ބެލެވޭ ސްޕެއިނުގެ ޑިފެންޑަރު އެރިކް ގާސިއާ އެވެ. އޭގެ 11 މިނިޓް ފަހުން، ރޮބަޓް ލެވަންޑޯސްކީ ވަނީ ބާސެލޯނާގެ ލީޑުފުޅާކޮށްދީފަ އެވެ. ބާސެލޯނާ އިން ފުރަތަމަ ހާފު ނިންމާލީ ދެ ގޯލު ކުރީގައި އޮވެގެންނެވެ.

ދެ ވަނަ ހާފު ފެށިގެން ދެ ވަނަ މިނިޓްގައި، ލެވަންޑޯސްކީ އޭނާގެ ދެ ވަނަ ގޯލު ޖަހައިދީ، ބާސެލޯނާ އަށް ތިން ގޯލުގެ ލީޑަކަށް ބަދަލުކޮށްލައިދީފަ އެވެ. ބަޔާން ދޫކޮށް 2022 ވަނަ އަހަރު ބާސެލޯނާއާ ގުޅުނު ލެވަންޑޯސްކީ ވަނީ އެ ޓީމަށް މިހާތަނަށް 84 ގޯލު ޖަހައިދީފަ އެވެ.

މެޗުގެ 56 ވަނަ މިނިޓްގައި، ބާސެލޯނާގެ ހަަތަރު ވަނަ ގޯލު ޖެހީ ޕަބްލޯ ޓޯރޭ އެެވެ. މިއީ، ބާބަސްޓްރޯގެ ކީޕަރު، އާނޯ ފަބްރޭގާ އަށް ހެދުނު ގޯހެއްގެ ފައިދާނަގައި، ޓޯރޭ ޖެހި ގޯލެކެވެ.

ކޮޕަ ޑެލް ރޭގެ އެންމެ ކާމިޔާބު ޓީމު ކަމަށްވާ ބާސެލޯނާ އިން 31 ފަހަރު އެ ތަށި ހޯދާފައިވާއިރު، އެންމެ ފަހުން މި މުބާރާތް ކާމިޔާބުކުރީ 2021 ވަނަ އަހަރު އެވެ.