އިއްޔެއާއި ރޭ ހުއްޓުމެއް ނެތި މާލެއަށް ވާރޭވެހި ހެދުނު ފެންގަނޑުގެ ސަބަބުން މާފަންނުގެ ގިނަ ގެތަކަށާއި ފިހާރަތަކަށް ފެން ވަދެ ވަމުންދިޔަ ގެއްލުންތަކުން ސަލާމަތްކުރަން ރަސްފަންނު މޫދަށް ކޯރެއް ކަނޑާލި ގޮތުގެ ވާހަކަ އެ މަސައްކަތުގައި އިސްވެ އުޅުނު ރިލްވާން ލަތީފު މި ނޫހަށް ކިޔައިދީފި އެވެ.

ރޭ 9:00 ހާއިރު ސޯޝަލް މީޑިއާގައި ކުރި ޕޯސްޓެއްގައި އެވަގުތު މާފަންނު ސަހަރާއިން ފެށިގެން ހުޅަނގަށް މަޖީދީ މަގުގައި ހެދިފައި އޮތް ފެންގަނޑު ފެންނަ ވީޑިއޯއެއް ރިލްވާނު ހިއްސާކުރި އެވެ. އަދި އިދާރާތަކުން ޖަވާބެއް ނުލިބުމުން ފެންގަނޑު ހިންދާނެ ގޮތެއް ނެތި ރަސްފަންނު ކައިރި ހުރި ފާރެއް ތަޅާލާ މޫދަށް ކޯރެއް ކޮނެފައިވާ ކަމަށް އޭނާ ލިޔެފައިވެ އެވެ.

އެ ވާހަކަ ބައެއް ނޫސްތަކުން ވެސް ރޭ ރިޕޯޓުކުރި އެވެ. ނަމަވެސް ,ސަރުކާރުގެ ބައެއް އިސް މަގާމުތަކުގައި ތިބި އޮފިޝަލުން ވަނީ އެކަން ކުރީ އާންމުން ނޫން ކަމަށާއި އެ މަސައްކަތުގައި ހަރަކާތްތެރިވީ ފެން ކުންފުނީގެ މުވައްޒަފުން ކަމަށް ބުނެފަ އެވެ. އެއާއެކު ބައެއް ނޫސްތަކުން ވަނީ ހަބަރުތަކުގެ ސުރުހީ ވެސް ބަދަލުކޮށްފަ އެވެ.

ނަމަވެސް، ކޯރު ކެނޑި ސަރަހައްދުގައި ހުރެ މި ނޫހުގެ ނޫސްވެރިންނާ ވާހަކަ ދައްކަމުން ރިލްވާން ބުނީ އެވަގުތު ކޯރު ކެނޑުމަށް މަރުތެޔޮ ހޯދީ 'މަނަސް ހާޑްވެއާ' ކިޔާ ފިހާރައަކުން ކަމަށެވެ. އަދި އެކަން ކުރީ އެ ސަރަހައްދުގެ ފިހާރަތަކުގެ ވެރިންނާއި އާންމުން ކަމަށް އޭނާ ބުންޏެވެ.

"ވަކި ހިސާބަކުން މިތަން ނުކޮނެ ނެތް ވާކަށް. އެހެންވެ މަނަސް ހާޑުވެއާގެ މަސައްކަތު މީހަކު ގޮސް އުދެއްޔަކާ ފަކީރާއެއް ހިފައިގެން އައިސް ދެން ބާކީބައި ކޮންނަން ފެށީ،" އޭނާ ބުންޏެވެ.

މަސައްކަތުގައި އެ ސަރަހައްދުގެ ގިނަ ބަޔަކު ބައިވެރިވިކަން ފާހަގަކޮށް އިމްރާން ވަނީ ރޭ ކުރީ ޓީމު ވޯކެއް ކަމަށްވެސް ބުނެފަ އެވެ. އަދި، އެކަން ކުރީ އާންމުން ނޫން ކަމަށް ސަރުކާރުގެ ވެރިން ބުނަން އުޅޭ ސަބަބެއް ނުވިސްނޭ ކަމަށްވެސް އޭނާ ބުންޏެވެ.

"މިކަން އޮޅުވާލައިގެން ކުރުމުގެ ބޭނުމެއްވެސް ނެތް. އަހަރުމެން މިކަން ކުރީކީ އަހަރުމެންނަށް މާލީ ފައިދާއެއް ތަނަކުން ވާނެ ކަމަކަށްވެސް ނޫން. އަހަރެމެންގެ ރަށްޓެހިންނާ އެތައް ބައެއްގެ ގޮދޮރާ ފިހާރަތަކާ އެއްޗެހި ސަލާމަތްކުރަން އިތުރަށް ހެދޭނެ ގޮތެއް ނެތީމަ އެކަން ކުރީ،" ރިލްވާން ބުންޏެވެ.

އަދި، ކޯރު ކެނޑުމަށްފަހު ފެން ދައުރުވާން ފެށުމުން އެ ތަނުން ދިޔައީ ކަމަށާއި އޭގެ ފަހުން ބަޔަކު އައިސް ހަރަކާތްތެރިވި ކަމެއް ނޭނގޭ ކަމަށާއި އޭރު މައްސަލައަށް ކޮންމެވެސް ވަރެއްގެ ހައްލެއް ލިބި ކޯރު ކެނޑިފައިވާ ކަމަށްވެސް އޭނާ ބުންޏެވެ.

އިއްޔެ، މާލޭގައި ފެން ބޮޑުވުމުގެ ސަބަބުން ދިރިއުޅެން އުނދަގޫވި ހާލަތަށް ދިޔަ 36 ގޭބިސީއެއްގެ 226 މީހަކަށް ވަގުތީ ބޯހިޔާވަހިކަމާއި، ކެއިންބުއިން ފޯރުކޮށްދީފައިވާ ކަަމަށް ނެޝަނަލް ޑިޒާސްޓަ މެނޭޖްމެންޓު ސެންޓަރުން ބުނެފައިވެ އެވެ.

އެ ސެންޓަރުން ބުނީ ފެން ބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓުކުރި ކަމަށާއި އޭގެ ތެރެއިން 554 ފަރާތުން އެދުނީ ފެން ވަނުން މައިތިރިކުރަން ވެލި ބަސްތާ ޖަހައި ދިނުމަށް ކަމަށެވެ.