ފޮރިން މިނިސްޓަރު ޑރ. އަބްދުﷲ ހަލީލް އިންޑިއާއަށް ކުރައްވާ ރަސްމީ ދަތުރުގެ ތެރެއިން، އިންޑިއާގެ ހިލޭ އެހީގެ ދަށުން ރާއްޖޭގައި ޕްރޮޖެކްޓުތަކެއް ހިންގަން އެމްއޯޔޫއެއްގައި މިއަދު ސޮއިކޮށްފި އެވެ.

އެ އެމްއޯޔޫގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓަރު ހަލީލެވެ. އަދި އިންޑިއާގެ ފަރާތުން ސޮއިކުރެއްވީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރެވެ.

ނަމަވެސް އެ އެމްއޯޔޫގެ ތަފްސީލެއް މިހާތަނަށް ދެ ގައުމުން ވެސް ހާމަކޮށްފައެއް ނުވެ އެވެ.

ފޮރިން މިނިސްޓަރު ހަލީލް އިންޑިއާއަށް ކުރައްވާ ދަތުރުފުޅުގެ ތެރެއިން ޖައިޝަންކަރުގެ އިތުރުން އިންޑިއާގެ އިސްވެރިންނާ އެކު ވަނީ ރަސްމީ މަޝްވަރާތައް ބާއްވައިފަ އެވެ.

މިއަދު ބޭއްވި މަޝްވަރާތަކުގެ ތެރެއިން ދެ ގައުމުގެ ގުޅުން ބަދަހިވަމުން އަންނަ ކަމަށް ޖައިޝަންކަރު ވަނީ ވިދާޅުވެފަ އެވެ. އަދި ކުރިއަށް އޮތް ތަނުގައި ވެސް ގުޅުން އިތުރަށް ވަރުގަދަވާނެ ކަމަށް އޭނާ ވިދާޅުވި އެވެ.

އެ ބައްދަލުވުމުގައި ހަލީލު ވެސް ވަނީ ދެ ގައުމުގެ ދެމެދުގެ އޮތް ގުޅުމުގެ މައްޗަށް އަލިއަޅުވާލައި ވާހަކަ ދައްކަވައިފަ އެވެ. އަދި އިންޑިއާއިން އަބަދުވެސް ރާއްޖެއަށް ދެމުން އަންނަ އެހީތެރިކަމަަށް ޝުކުރުވެރިވާ ކަމަށް ވެސް އޭނާ ވަނީ ވިދާޅުވެފަ އެވެ.

މިއީ ރާއްޖޭގެ ފޮރިން މިނިސްޓަރުގެ މަގާމާ ސެޕްޓެމްބަރު 30، 2024، ގައި ހަވާލުވެވަޑައިގެން ފަހުން ހަލީލު އިންޑިއާއަށް ކުރައްވާ ފުރަތަމަ ރަސްމީ ދަތުރެވެ.