އަބޫދާބީ (ޑިސެމްބަރު 29) - މެންޗެސްޓާ ޔުނައިޓެޑްގެ ލެޖެންޑް ކްރިސްޓިއާނޯ ރޮނާލްޑޯ އެ ކްލަބްގެ ހިންގުމާ ގުޅޭ ކަންކަމަށް ވެސް ޝައުގުވެރިކަން ހުރިކަމަށް ބުނެފި އެވެ.

ގްލޯބް ސޮކާ އެވޯޑްސްގައި ވާހަކަ ދައްކަމުން ރޮނާލްޑޯ ވަނީ އޭނާ ކޯޗެއްގެ ގޮތުގައި ނުފެންނާނެކަން ހާމަކޮށްފަ އެވެ. އެކަމަކު، ފުޓުބޯޅައިގެ ސީނިއާ މެނޭޖްމަންޓާ ގުޅޭ ކަންކަމުގެ ތެރެއިން އޭނާގެ މަސައްކަތް ފެންނާނެ ކަމަށް ރޮނާލްޑޯ ވަނީ ބުނެފަ އެވެ.

އެ ގޮތުން، ކްލަބެއް ހިންގުމުގެ ޝައުގުވެރިކަން ގެންގުޅޭއިރު، ޔުނައިޓެޑަކީ ވެސް ރޮނާލްޑޯ ހިތުގައި އޮތް ނަމެއް ކަމަށް ވަނީ ބުނެފަ އެވެ.

ރޮނާލްޑޯ ވަނީ ޔުނައިޓެޑް ހިންގުމުގައި ހުރި މައްސަލަތަކާ ހެދި އެ ކްލަބްގެ ހާލަތާމެދު ކަންބޮޑުވާ ކަމަށް ބުނެފަ އެވެ. އަދި ޔުނައިޓެޑްގެ މައްސަލަ އަކީ ކޯޗު ނޫން ކަމަށާއި، އެ ކްލަބްގެ މައްސަލަ ފެށޭ ހިސާބަކީ "ޓޮޕް މެނޭޖްމަންޓް" ކަމަށް ރޮނާލްޑޯ ވަނީ ބުނެފަ އެވެ.

"ފެންގަނޑު ސަކަރާތް ވެފައި ހުރި މަސްގަނޑެއްގައި އެއް މަސް ނަގައި އެ އަށް ފަރުވާކޮށް އަލުން އެ މަސް ފެންގަނޑަށް ލިޔަސް އެ މަސް ހަމަ ބަލިވާނެ. އެއީ ޔުނައިޓެޑް އަށް ދިމާވެފައިވާ މައްސަލަ އަކީ." ރޮނާލްޑޯ ބުންޏެވެ.

ޔުނައިޓެޑް ކަހަލަ ބޮޑު ކްލަބެއްގެ އިސް މަގާމެއްގައި މަސައްކަތް ކުރަން ބޭނުންވޭތޯ ކުރި ސުވާލަށް ޖަވާބު ދެމުން ރޮނާލްޑޯ ބުނީ އޭނާގެ އަމާޒަކީ ބޮޑު ކްލަބެއްގައި މަސައްކަތް ކުރުން ކަމަށެވެ. އަދި އެއީ ޔުނައިޓެޑް ތޯ ބުނަން މި ވަގުތު ނޭނގޭ ކަމަށް ރޮނާލްޑޯ ވަނީ ހާމަކޮށްފަ އެވެ.

ރޮނާލްޑޯ މިހާރު ވެސް، އަމިއްލަ ބްރޭންޑެއް ހަދައި ފުޅާ ދާއިރާއަކަށް ވިޔަފާރި ކުރަމުން ގެންދެ އެވެ. އެ ގޮތުން އޭނާގެ އަމިއްލަ ބްރޭންޑް ސީއާރް 7 ކުޑައިގެ ދަށުން, އަންނައުނު ވިއްކުމާއި, ސެންޓް ވިއްކުން އަދި ވިޔަފާރި ހޮޓަލްތައް ވެސް ހިމެނެ އެވެ.