އުތުރު ގާޒާގައި ބޭނުން ކުރެވޭ ގޮތަށް ހުރި ހަމައެކަނި ހޮސްޕިޓަލަށް އިއްޔެ އިޒްރޭލުގެ ސިފައިން ވަދެގަނެ، އެތަން ރޯކޮށްލި މައްސަލަ ދިވެހި ސަރުކާރުން ކުށްވެރިކޮށްފި އެވެ.

ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނީ ކަމާލް އަދުވާން ހޮސްޕިޓާ ހިސޯރުކޮށް އެތަން ރޯކޮށްލުމަކީ ބައިނަލްއަގުވާމީ ގާނޫނުތަކާއި ހިލާފު ލާއިންސާނީ އަމަލެއް ކަމަށެވެ.

"ސިއްހީ ހިދުމަތްދޭ އެފަދަ ތަންތަނަށް ދޭ ހަމަލާތަކަކީ ހަނގުރާމައިގެ ކުށެއް. އަދި އެއީ ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ކަންކަމަށް އިތުރުވި ބޮޅެއް،" ހާރިޖީ އޮފީހުން ނެރުނު ބަޔާނުގައި ބުނެފައިވެ އެވެ.

އެ ބަޔާނުގައި ސަރުކާރުން އދ. ގެ ނެޝަނަލް ސެކިއުރިޓީ ކައުންސިލަށް އަނެއްކާ ވެސް ގޮވައިލީ އިޒްރޭލުން ހިންގަމުންދާ ލާއިންސާނީ އަމަލުތަކަށް ފިޔަވަޅު އެޅުމަށެވެ. އަދި އެ އަނިޔާވެރިކަން ހުއްޓުވައި، ޒިންމާވާންޖެހޭ ފަރާތްތަކަށް ފިޔަވަޅު އަޅަން ވެސް ސަރުކާރުން ގޮވައިލި އެވެ.

އަދުވާނު ހޮސްޕިޓަލަށް ވަދެގަނެ އިޒްރޭލުން ވަނީ އެތަނުގައި މަސައްކަތް ކުރާ ގިނަ ބަޔަކު ހައްޔަރުކޮށްފަ އެވެ. އޭގެ ތެރޭގައި އެ ހޮސްޕިޓަލުގެ ޑައިރެކްޓަރު ޑރ. އަބޫ ސަފިއްޔާ ވެސް ހިމެނެ އެވެ. ހޮސްޕިޓަލަށް ވަދެގަނެ އިޒްރޭލުން ވަނީ ބަލިމީހުން އެތަނުން ބޭރުކޮށް، އެތައް ބަޔަކު ބަރަހަނާކޮށް ގަންހިންގުވައިފަ އެވެ.

އޮކްޓޯބަރު 7، 2023، ގައި އިޒްރޭލުން ފަލަސްތީނާ ދެކޮޅަށް ހިންގަމުންދާ ނަސްލުހޭދު ކުރުމުގައި މިހާތަނަށް ވަނީ 45،484 މީހުން މަރާލައިފަ އެވެ. މަރާލި މީހުންގެ ތެރޭގައި ވަރަށް ބޮޑު ބަޔަކީ ކުޑަކުދިންނެވެ. އޭގެ އިތުރުން އިޒްރޭލުގެ ހަމަލާތަކުގައި 108،090 މީހުން ވަނީ ޒަހަމްކޮށްލައިފަ އެވެ.