ރޭސިން އެސޯސިއޭޝަނުން އިންތިޒާމުކޮށްގެން ހުޅުމާލޭގައި މިއަދު ބޭއްވުމަށް ހަމަޖެހިފައި އޮތް ރާސް ޗެމިއަންޝިޕް 2024 އަށް ފުލުހުން ހުރަސް އަޅައިފި އެވެ.

ރޭސިން އެސޯސިއޭޝަންގެ ޕީއާރް މެނޭޖަރު މުހައްމަދު އިބްރާހިމް "އަދަދު" އަށް ވިދާޅުވީ މިއަދާއި މާދަމާ ބޭއްވުމަށް ހަމަޖެހިފައި އޮތް ރާސް ޗެމްޕިއަންޝިޕަށް ފުލުހުން ހުރަސް އެޅީ ލިޔުމުން އެ މުބާރާތް ބޭއްވުމަށް ހުއްދަ ދީފައި ނުވާތީ ކަމަށެވެ.

ނަމަަވެސް އެ މުބާރާތް ބާއްވަން ސްޕޯޓްސް މިނިސްޓަރު އަބްދުﷲ ރާފިއު މެދުވެރިކޮށް މިނިސްޓްރީތަކާއި ފުލުހުން އަދި އެޗްޑީސީން ލިޔުމަކާއި ނުލައި ހުއްދަތައް ހޯދި ކަމަށް އޭނާ ވިދާޅުވި އެވެ.

"މިހާރު އަޅުގަނޑުމެންނަށް މި ދިމާވެފައި މިއޮތް ކަމަކީ އަޅުގަނޑުމެންނަށް މިތަނުގައި މިކަން ކުރަން މީގެ ގާތްގަނޑަކަށް އެއް މަސް ކުރިން އޮތީ ހުއްދައެއް ދީފައި. ދެން ސެންޓްރަލް ޕާކް ކައިރީގައި ހިނގައިދިޔަ އެކްސިޑެންޓަކާ ގުޅިގެން ރަސްމީ ސިފައެއްގައި ހުއްދައެއް ނުދޭ ވާހަކަ ބުނެފައި އޮތީ އެޗްޑީސީން ވެސް. "އަޅުގަނޑުމެން އެކަމާ ގުޅިގެން ކޯޑިނޭޓް ކުރަން ފެށީ ސްޕޯޓްސް މިނިސްޓަރު ރާފިއުއާ،" މުހައްމަދު އިބްރާހިމް ވިދާޅުވި އެވެ.

މިދިޔަ ދުވަސްތަކުގައި ހުއްދަ ނަގައިގެން ފަރިތަކުރުންތަކެއް ކުރިއަށް ގެންދިޔަކަން ފާހަގަ ކުރައްވާ މުހައްމަދު އިބްރާހިމް ވިދާޅުވީ އިވެންޓު ބާއްވަން ހުއްދަ ނުލިބޭކަން އެންގީ ރޭގެ ވަގުތެއްގައި ކަމަށާއި އިވެންޓު ބާއްވަން ގިނަ މަސައްކަތްތަކެއް މިހާތަނަށް ކުރެވުނު ނަމަވެސް އަލިމަގެއް ފެނިފައި ނުވާ ކަމަށެވެ.

ރާސް ޗެމްޕިއަންޝިޕް ބާއްވަން ތައްޔާރުވެފައި: އެ މުބާރާތް ބޭއްވުމަށް ފުލުހުން ވަނީ ހުރަސް އަޅާފައި -- ފޮޓޯ: ރޭސިން އެސޯސިއޭޝަން

އެ އިވެންޓު ބާއްވަން އެޗްޑީސީން އިއްޔެ ހަވީރު އިވެންޓު ބާއްވާ ސަރަހައްދުގައި އެ ކުންފުނީގެ ބެކްޑްރޮޕްތައް ވެސް ޖެހި ކަމަށާއި އެއީ އެޗްޑީސީން ވެސް އިވެންޓު ބާއްވަން އެއްބާރުލުން އިއްޔެއާ ހަމައަށް ވެސް ދޭން ނިންމާފައިވާތީ ކަމަށެވެ.

"އިވެންޓަށް ސެޓަމް ޖަހަން ތިއްބާ ރޭ 11:00 ޖަހާއިކަށްހާއިރު މިތަނަށް އަންނަނީ ޕޮލިހުން އައިސް އަޅުގަނޑުމެންނަށް މި ދަންނަވަނީ އިވެންޓު ކުރިއަށް ނުގެންދެވޭނެއޭ. އިވެންޓަށް ހުއްދައެއް ދެވިއެއް ނެތޭ. އެހެންވީމަ ޖެހޭނީ ރޫޅާލާށޭ. އެންގި ހިސާބުން އެކި މީހުންނަށް ގުޅަން ފަށައިގެން ސޯޓްއައުޓެއް ނުވޭ އަދިވެސް" އޭނާ ވިދާޅުވި އެވެ.

އިވެންޓު ބާއްވަން ކުޑަތަން ވެފައި ވަނިކޮށް ކުއްލިއަކަށް އިވެންޓު ނުބޭއްވޭނެ ކަމަށް ނިންމާފައިވަނީ ކޮންމެވެސް ބައެއްގެ ނުފޫޒު އޭގެ ތެރެއަށް ވަދެގެން ކަމަށް މުހައްމަދު އިބްރާހިމް ތުހުމަތު ކުރެއްވި އެވެ.

މުބާރާތް ބޭއްވުމަށް ޝީޝާފަދަ ތަންތަނުން ސްޕޮންސާ ލިބުނުކަން ފާހަގަކުރައްވާ އޭނާ ވިދާޅުވީ ކުރިއަށް އޮތްތަނުގައި މުބާރާތްތަކަށް ސަރުކާރުގެ ފިއްތުންތައް ކުރިމަތިވާނަމަ، ސްޕޮންސާތައް ވެސް މުބާރާތްތަކަށް ހޯދަން އުނދަގުވާނެ ކަމަށެވެ.

ރާސް ޗެމްޕިއަންޝިޕްގައި 15 ޓީމަކުން 78 ރައިޑަރުން ބައިވެރިވާއިރު، މުބާރާތުގައި ސައިކަލާއި ކާރު ހިމެނޭ ޖުމްލަ 15 ކެޓަގަރީއެއް ހިމެނެ އެވެ. އެ މުބާރާތަށް ރަށްރަށުން ބައެއް ރައިޑަރުން އައިސްފައި ވަނީ އެ ރައިޑަރުން ދުއްވާ ވެހިކަލްތަކާ ވެސް އެކުގަ އެވެ.

ރާސް ޗެމްޕިއަންޝިޕަކީ އަހަރުގެ ތެރޭގައި މާލެ ސަރަހައްދުގައި ބާއްވާ ރޭސިންގެ އެންމެ ބޮޑު މުބާރާތެވެ. އަދި އެއީ މި އަހަރު އެ އެސޯސިއޭޝަނުން ބާއްވާ އެންމެ ފަހު މުބާރާތެވެ.