އައިލެންޑް އޭވިއޭޝަން ސާވިސް (އައިއޭއެސް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން މިދިޔަ އަހަރުގެ ޑިސެމްބަރު 28، ގައި ވަކި ކުރި އާއިޝަތު ޖެނިފާގެ ވަޒީފާ އިޔާދަކޮށް ބަދަލު ދޭން ވަޒީފާއާ ބެހޭ ޓްރައިބިއުނަލްއިން ނިންމި މައްސަލަ ހުއްޓުވަން ހައި ކޯޓުން އަމުރެއް ނެރެފި އެވެ.

ހައި ކޯޓުގެ ތިން ފަނޑިޔާރުން ސޮއި ކުރައްވާ އެ އަމުރުނު ނެރުނީ އައިލެންޑް އެވިއޭޝަނުން އެދުނު ކަންކަމަށް ރިއާޔަތް ކުރުމަށް ފަހު، އެ މައްސަލަ ބަލާ ނިމެންދެން އަމުރު ތަންފީޒު ކުރަން މަޑު ޖައްސާލުމަށެވެ.

ޓްރައިބިއުނަލްއިން އައިލެންޑް އެވިއޭޝަންގެ މައްޗަށް ކުރި އަމުރު މިދިޔަ މަހު އެ ކުންފުނިން ހައި ކޯޓުގައި އިސްތިއުނާފު ކުރި އެވެ.

މިދިޔަ އޮކްޓޯބަރު 13، ގައި ޓްރައިބިއުނަލުން ނިންމީ ޖެނިފާ ވަޒީފާއިން ވަކިކުރީ މުވައްޒަފަކު ވަޒީފާއިން ވަކި ކުރުމަށް ހުއްދަ ކުރާ ފަދަ ހާލަތެއް މެދުވެރިވެގެން ކަމަށް ބުރަވެވެން ނެތް ކަމަށް ބުނެ އެވެ.

އައިލެންޑް އޭވިއޭޝަންގެ މައްޗަށް އަމުރު ކުރީ ޖެނިފާ ކުރިން އަދާ ކުރަމުން ދިޔަ ޑެޕިއުޓީ ޑީއެމްޑީގެ މަގާމަށް އަލުން ރުޖޫއަކޮށް، އޭނާއަކީ ވަޒީފާއިން ވަކިވި ފަރާތެއް ކަމަށް ނުބަލައި ވަޒީފާއިން ވަކި ކުރި ތާރީހުން ފެށިގެން މައްސަލަ ނިމުނު ތާރީހާ ހަމައަށް ހޭދަވި މުއްދަތަށް ހައްގުވާ މުސާރަ އާއި އިނާޔަތްތައް ދިނުމަށެވެ.

ޖެނިފާ ހުންނެވީ މަގާމުގެ ގޮތުން މުސާރަ އާއި އިނާޔަތްތަކާއެކު އޭނާއަށް މަހަކު 56،171ރ. ލިބެ އެވެ. އެހެންކަމުން ޖެނިފާ މަގާމުން ވަކި ކުރި ފަހުން ހިނގައިދިޔަ 10 މަސް ދުވަހަށްވާ 561،710ރ. އައިލެންޑް އޭވިއޭޝަނުން އޭނާއަށް ދޭންޖެހޭނެ އެވެ.

އޭގެ އިތުރުން ވަޒީފާއިން ވަކި ކުރުމުން ލިބުނު ގެއްލުމުގެ ބަދަލެއްގެ ގޮތުން އެއް މަހުގެ މުސާރަ އާއި އިނާޔަތްތައް ނަގައިދިނުމަށް ވެސް ޓްރައިބިއުނަލުން އެންގި އެވެ.