ޕާޓީ ބަދަލުކޮށްފި ނަމަ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ މާއްދާ ގާނޫނު އަސާސީގައި ހިމަނާފައި އޮތުމާ ގުޅިގެން އެންޓި ޑިފެކްޝަން ގާނޫނުގައި ގޮނޑި ގެއްލޭ ކަމަށް ބުނާ މާއްދާއަކީ ބާތިލު މާއްދާއެއް ކަމަށް ކަނޑައަޅައިދިނުމަށް އެދި ހައިކޯޓަށް ހުށަހަޅި މައްސަލަ ބޭރުކޮށްލައިފި އެވެ.

އެންޓި ޑިފެކްޝަން ގާނޫނުގެ މައްސަލަ ދުސްތޫރީ މައްސަލައެއްގެ ގޮތުގައި ހައިކޯޓަށް ހުށަހެޅީ އާންމުންގެ މީހެކެވެ.

އެ މީހާ ހުށަހެޅި މައްސަލައިގައި އޮތީ މެންބަރުކަމުން ވަކިވާނެ ހާލަތްތަކާއި އިސްތިއުފާ ދިނުމުގައި އަމަލުކުރާނެ އުސޫލު ގާނޫނު އަސާސީގައި ކަނޑައަޅާފައި އޮއްވާ، އެންޓި ޑިފެކްޝަން ގާނޫނުގައި މެންބަރުކަމުން ވަކިވުން ލާޒިމު ހާލަތްތައް ކަނޑައަޅާފައި އޮތީ ގާނޫނާ ހިލާފަށް ކަމަށެވެ.

މި މައްސަލަ ބަލައިނުގަންނަން ހައިކޯޓުގެ ރަޖިސްޓްރާ މަރިޔަމް ހޫރުޝިދާ ނިންމި ނިންމުމުގައި ބަޔާންކޮށްފައިވާ ގޮތުގައި، މި މައްސަލަ ހުށަހެޅި ފަހުން ގާނޫނުއަސާސީ ބަދަލުކޮށްފައިވާތީ، ދައުވާ ބިނާކުރި ސަބަބުތައް އެގޮތުގައިވާ ކަމަށް ނުބެލެވެ އެވެ.

ގާނޫނުއަސާސީގައި މިހާރު އޮންނަނީ އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން މަޖިލީހުގެ ގޮނޑި ގެއްލޭނެ ކަމަށެވެ. މި މާއްދާތައް ބާތިލުކުރަން ސުޕްރީމް ކޯޓަށް މައްސަލަ ވަނީ ވައްދައިފަ އެވެ.

ސުޕްރީމް ކޯޓުން ވަނީ މި މައްސަލަ ބަލައިގެންފަ އެވެ. ނަމަވެސް ކޯޓު ރީސެސްގައި އޮތުމާ ގުޅިގެން އަދި އަޑުއެހުމެއް ތާވަލެއް ނުކުރެ އެވެ. މި މައްސަލައިގެ ތެރެއަށް ތަދައްހުލުވާން އިދިކޮޅު ދެ ޕާޓީ ކަމުގައިވާ އެމްޑީޕީ އާއި ދަ ޑިމޮކްރެޓްސްއިން ވަނީ ނިންމާފަ އެވެ.