މާދަމާއިން ފެށިގެން ޑިސެމްބަރު މަހުގެ ނިޔަލަށް ހައިކޯޓު ރިސެސް އަށް ދާން ނިންމާފައިވާ ކަމަށް އެ ކޯޓުން ބުނެފި އެވެ.

މިއަދު ނެރުނު ބަޔާނެއްގައި ބުނީ، ޑިސެމްބަރު 1، އިން 31، އަށް ރިސެސްއަށް ދިޔަ ނަމަވެސް ބައެއް މައްސަަލަތައް ކުރިއަށް ގެންދިއުމަށް ފަނޑިޔާރުންގެ އާންމު މަޖިލީހުން ނިންމާފައިވާ ކަމަށެވެ.

އެގޮތުން، މި މުއްދަތުގައި ބަލާނީ B12 ސެކްޝަނުން ބަލާ މައްސަލަތަކާއި، މޮނިކޮން އަމުރުތަކާއި، އަވަސް ތަބީއަތުގެ އަމުރުތަކާއި ހުކުމް ތަންފީޒުކުރުން ފަސްކުރުމުގެ އަމުރުތަކާއި އިޖުރާއީ އަމުރުތަކާއި އިއުތިރާޒާ ގުޅޭ ނިންމުންތަކުގެ ތެރެއިން މުއްދަތު ހަމަވާ މައްސަލަތައް ކަމަށް އެ ކޯޓުން ބުންޏެވެ.

މީގެ އިތުރުން، ޝަރީއަތްތަކުގައި ހުކުމް ކުރުމަށް ބާއްވާ ޝަރީއައްތައްވެސް ރިސެސްގެ މުއްދަތުގައި ކުރިއަށް ގެންދާނެ ކަމަށް ހައި ކޯޓުން ބުންޏެވެ.

ހައި ކޯޓުގެ ގަވާއިދުގައި ބުނެފައި ވަނީ ގާނޫނަކުން ވަކި ކަމެއް ވަކި މުއްދަތެއްގައި ނިންމުމަށް އެ ކޯޓަށް ލާޒިމްވެފައިވާ ހާލަތެއްގައި، ނުވަތަ ހައިކޯޓުގެ ފަނޑިޔާރުންގެ އާންމު މަޖިލީހުން އެނޫން ގޮތަކަށް ކަނޑައަޅައިފި ހިނދެއްގައި ޓާމް ފެށުމުގެ ކުރިންވެސް މައްސަލަތައް ކުރިޔަށް ގެންދެވިދާނެ ކަމަށެވެ.