ނެޝަނަލް ޑްރަގް އެޖެންސީ (އެންޑީއޭ) އިން އެކުލަވާލާފައިވާ 11 މެންބަރުންގެ ޓެކްނިކަލް ކޮމިޓީން، އެ އެޖެންސީގެ ޓެކްނިކަލް ނިންމުންތަކެއް ނިންމުމުގެ ޒިންމާ މިއަދު ހަވާލުކޮށްފި އެވެ.

އެންޑީއޭއިން ބުނީ އޮކްޓޯބަރު 30، ގައި އުފެއްދި ޓެކްނިކަލް ކޮމިޓީން ބޭއްވި ފުރަތަމަ ބައްދަލުވުމުގައި ސަބް ކޮމިޓީއެއް އުފެއްދުމަށް މަޝްވަރާކޮށް، ސަބް ކޮމިޓީއެއް އުފައްދަން ނިންމާފައިވާ ކަމަށެވެ.

އެ ސަބް ކޮމިޓީގެ މަސްއޫލިއްޔަތުތަކުގެ ތެރޭގައި ހިމެނެނީ ގައުމީ ފެންވަރުގައި މަސްތުވާތަކެތީގެ ޑިމާންޑް މަދުކުރުމާއި، އޭގެ ސަބަބުން ކުރިމަތިވާ ގެއްލުންތައް ކުޑަކުރުމާއި، އަދި މަސްތުވާތަކެތީގެ ސަޕްލައި މަދުކުރުމަށް ކުރަންޖެހޭ މަސައްކަތްތައް ކުރުމެވެ.

އެންޑީއޭގެ ޓެކްނިކަލް ކޮމިޓީއަށް އައްޔަނުކުރި މެންބަރުން:

• އަބްދުﷲ ފަސީހް - ޑެޕިއުޓީ ޑިރެކްޓާ ޖެނެރަލް (ޗެއާޕާސަން).
• ޝަމާ ނަސީރް - ކައުންސިލަރު (ވައިސް ޗެއާޕާސަން).
• މަރިޔަމް އަސްރާ - ޑިރެކްޓަރު.
• އައިޝަތު ޝިއުނާ - އެސިސްޓެންޓް ޑިރެކްޓަރު.
• އަލީ ރިޔާޒު - އެސިސްޓެންޓް ޑިރެކްޓަރު.
• ފާތިމަތު ސާނިހާ ސޯލިހު - އެސިސްޓެންޓް ޑިރެކްޓަރު.
• އަހުމަދު ހިލްމީ - ލީގަލް އޮފިސަރު.
• ހައްވާ އަގުލާ އަހްމަދު - ސީނިއާ ޕްރޮގްރާމް ކޯޑިނޭޓަރު.
• މަރިޔަމް އާދަމް - ޕްރޮގްރާމް އޮފިސަރު.
• އަހްމަދު ފިރާގް - އެސިސްޓެންޓް ކައުންސިލަރު.
• އާމިނަތު ރިޔާޒާ - އެސިސްޓެންޓް ކައުންސިލަރު.

އެންޑީއޭގެ ބޯޑު ޖޫން 24، ގައި ޗެއާމަނަކަށް ހޯމް މިނިސްޓްރީގެ ސްޓޭޓް މިނިސްޓަރު ލުބްނާ މުހައްމަދު ޒާހިރު ވަނީ އައްޔަންކޮށްފަ އެވެ. އޭނާއާއެކު ބޯޑުގައި ޖުމްލަ ހިމެނެނީ 10 މެންބަރުންނެވެ.

އެންޑީއޭގެ އާ ބޯޑު އެކުލަވާލުމަށްފަހު އެ ބޯޑު މެންބަރުން ވަނީ މަސްތުވާތަކެތީގެ މައްސަލަ ހައްލު ކުރުމަށް ހުރިހާ ބޯޑު މެންބަރުންނަށް ޓާސްކުތައް ބަހާފަ އެވެ. އަދި މަސްތުވާތަކެތީގެ އިތުރު ފަސް ފަރުވާއެއް އިތުރު ކުރުމަށް ވެސް ބޯޑުން އޭރު ނިންމި އެވެ.

ނަމަވެސް މިހާތަނަށް ވެސް އެ ފަސް ފަރުވާ ދޭން ފެށިކަން އެންޑީއޭއިން ހާމަކޮށްފައެއް ނުވެ އެވެ.