ހަ ކިލޯއަށް ވުރެ ގިނަ މަސްތުވާތަކެތި ރާއްޖެއަށް އެތެރެކުރަން އުޅުނު ތިން މީހަކު، ވެލާނާ އިންޓަނޭޝަނަލް އެއާޕޯޓުން މިދިޔަ އަންގާރަ ދުވަހު ހައްޔަރުކޮށްފިއެވެ.

ފުލުހުން ބުނީ މި މައްސަލައިގައި ހައްޔަރުކުރީ ގދ. ގައްދޫ، ހިތިލާގެ، އަލީ އިރުފާނު، 28، އާއި، އިންޑިއާއަށް ނިސްބަތްވާ ދަނޫޝްކާދަން ގޯޕާލް، 19، އަދި ކަތިރިވިލް މަނިމަރަން، 21، ކަމަށެވެ.

އެ ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އަލީ އިރުފާން ޝަރީއަތް ނިމެންދެން ބަންދުކުރުމަށާއި، އިންޑިއާގެ ދެ މީހުންގެ ބަންދަށް ފަސް ދުވަސް ކޯޓުން ވަނީ ދީފައެވެ.

މި މައްސަލަ ފުލުހުން ތަހުގީގުކުރަން ފެށީ، އެ ތިން މީހުން ރާއްޖެއަށް މަސްތުވާތަކެތި އެތެރެކުރި ކަމުގެ ތުހުމަތުގައި މޯލްޑިވްސް ކަސްޓަމްސް ސާވިސްއިން އެ މީހުން ހިފަހައްޓައި، ފުލުހުންނާ ހަވާލުކުރުމުންނެވެ.

މިއީ މި އަހަރުގެ ތެރޭގައި ވައިގެ މަގުން ރާއްޖެއަށް އެތެރެކުރަން އުޅެނިކޮށް، މިހާ ގިނަ އަދަދެއްގެ މަސްތުވާތަކެތި އެއްފަހަރާ އަތުލައިގަތް ފުރަތަމަ ފަހަރެވެ. ނަމަވެސް، މި އަހަރު ކަނޑުގެ މަގުން ރާއްޖެއަށް އެތެރެކުރަން އުޅުނު މިއަށްވުރެ ގިނަ އަދަދެއްގެ މަސްތުވާތަކެތި މީގެ ކުރިން އަތުލައިގަނެފައިވެއެވެ.