ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކޮރަޕްޝަންގެ ގިނަ މައްސަލަތަކެއް ފެންމަތިވެފައިވާ ދަނޑިވަޅެއްގައި އެ ކުންފުނީގެ ފައިނޭންސް ޑިޕާޓްމަންޓާއި ޕްރޮޖެކްޓްސް ޑިޕާޓްމަންޓުން ދެ ދުވަސް މަތިން 10 ލެޕްޓޮޕް ވަގަށް ނަގައިފި އެވެ.

"އަދަދު" އިން ކުރި ސުވާލަކަށް ޖަވާބު ދެއްވަމުން ފުލުހުންގެ ތަރުޖަމާން އަހުމަދު ޝިފާން ވިދާޅުވީ އެޗްޑީސީން ލެޕްޓޮޕްތަކެއް ވަގަށް ނެގި މައްސަލަ ހުށަހެޅުމާއެކު، އެ މައްސަލަ ބަލަމުންދާ ކަމަށެވެ.

މި ނޫހަށް މައުލޫމާތު ލިބިފައިވާ ގޮތުގައި އެޗްޑީސީގެ ފައިނޭންސް ޑިޕާޓްމަންޓާއި ޕްރޮޖެކްޓްސް ޑިޕާޓްމަންޓުން އެ ލެޕްޓޮޕްތައް ވަގަށް ނެގީ މިދިޔަ ހުކުރު ދުވަހާއި އިއްޔެ އެވެ.

އެ މައްސަލަ ހުޅުމާލެ ޕޮލިސް ސްޓޭޝަނުން ބަލަމުންދާއިރު، މައްސަލައާ ގުޅިގެން ސުވާލު ކުރުމުގެ ކުރިން އެޗްޑީސީން ވައްކަން ކުރިކަން ފުލުހުން ހާމަ ކޮށްފައެއް ނުވެ އެވެ.

އެޗްޑީސީން ލެޕްޓޮޕްތަކެއް ވަގަށް ނެގީ މާލޭ ރަށްވެހިންނަށް ބޯހިޔާވަހިކަން ދޭން ކުރިޔަށް ގެންދިޔަ ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ވަގު ލިޔުންތަކެއް ތައްޔާރުކޮށް ގޯތިތަކެއް ވިއްކި ކަމަށް ތުހުމަތު ކުރެވޭ މައްސަލަ ފެންމަތިވެ، އެ މައްސަލަ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) އިން ބަލަމުން ދަނިކޮށެވެ.

އެ މައްސަލައާ ގުޅިގެން އެޗްޑީސީގެ ބައެއް މުވައްޒަފުންތަކެއް ސަސްޕެންޑު ކޮށްފައިވާއިރު، މިހާތަނަށް 15 މުވައްޒަފުން ވަނީ ވަކި ވެސް ކޮށްފަ އެވެ. އަދި އެ ކުންފުނީގެ މެނޭޖިން ޑިރެކްޓަރު ފަޒުލް ރަޝީދު ވެސް ވަނީ އިސްތިއުފާ ދެއްވާފަ އެވެ.

ގޯތި ވައްކަމަށް ފަހު އެޗްޑީސީގެ ގިނަ ކޮރަޕްޝަންގެ މައްސަލަތަކެއް ވަނީ ފެންމަތިވެފަ އެވެ. އޭގެ ތެރޭގައި ހުޅުމާލެއިން ނު އަގުގައި ގޯތިތައް ވިއްކުން ހިމެނެ އެވެ.